Исроил бош вазири Биньямин Нетаньяху давлат бюджетининг мудофаа учун сарфланадиган харажатларини йилига 20 миллиард шекелга (деярли 5,5 миллиард доллар) ошириш зарурлигини маълум қилди. Бу ҳақда “ТАСС” хабар бермоқда.
Нетаньяхунинг сўзларига кўра, сўнгги йилларда Исроил ҳукумати мудофаа бюджетини рақамларда оширган бўлса-да, лекин аслида ЯИМга нисбатан фоизда камайган.
“Биз энди бу сиёсатни давом эттира олмаймиз. Бундан буён биз мудофаа бюджетини йилига камида 20 миллиард шекелга ошириш, шунингдек, хавфсизлик эҳтиёжларимизни қондириш учун ялпи ички маҳсулотнинг мудофаа харажатлари бўйича улушини оширишимиз керак”, — деди Нетаньяху.
У, шунингдек, уруш шароитида Исроил иқтисодиёти барқарорлигини сақлаш муҳимлигини таъкидлади ва Ғазо секторидаги ҳарбий операция мақсадлари ўзгармаслигини яна бир бор айтиб ўтди.
“Мақсадлар ҲАМАС ҳаракатини йўқ қилиш, гаровга олинганларни озод қилиш ва узоқ муддатли — Ғазо секторидан Исроилга таҳдидларни бартараф этиш”, — деди Нетаньяху.
Изоҳ (0)