Украинанинг Закарпат вилояти Керецковский қишлоқ кенгаши йиғилиши чоғида маҳаллий депутат гранаталарни портлатиб юборди, оқибатда йигирма олти киши жароҳат олди. Бу ҳақда Украина миллий полицияси хабар берди.
Ҳодиса 15 декабрь, жума куни Мукачево туманидаги Керецковский қишлоқ кенгаши биносида маҳаллий вақт билан соат 11:30 атрофида содир бўлган. Қишлоқ кенгаши депутати сессия йиғилишига граната олиб келган ва уларни портлатиб юборган. Ҳодиса оқибатида 26 киши тан жароҳати олган, улардан 6 нафарининг аҳволи оғир.
Полициянинг қайд этишича, шифокорлар гранаталарни портлатган одамга реанимация чораларини кўрмоқда.
Сессия йиғилишида граната портлаши акс этган видеода муҳокама кетаётган пайт хонага бир эркак кирганини кўриш мумкин. У мунозарада қатнашмаган, лекин гранаталарни чиқариб, уларни портлатган.
Маҳаллий Mukachevo.net нашри ва журналист Виталий Глаголийнинг ёзишича, гап “Халқ хизматчиси” партиясидан Керецковский қишлоқ кенгаши депутати Сергей Батрин ҳақида кетмоқда. Айни пайтда эркакнинг тирик экани маълум. Сессияда депутатлар маҳаллаларнинг 2024 йилги бюджетини қабул қилиш масалаларини кўриб чиққан.
Изоҳ (0)