Мухбир Хуршид Далиев қаерда сақланаётгани маълум бўлди

“Компромат иши” юзасидан айбланувчиларга суд ҳукми ўқилиб, мухбир Хуршид Далиев 7 йилга қамалган эди.

 

“Бугун.уз” ўз манбасига таяниб хабар беришича,  “Компромат.узб” Telegram канали собиқ администратори Хуршид Далиев Тошкент вилояти Бўстонлиқ туманида жойлашган “Товоқсой” номи билан танилган №64/3 сонли ахлоқ тузатиш колониясига жўнатилган.

Хуршид Далиев Жиноят-процессуал кодексининг 83-моддаси (реабилитация учун асослар) 1-бандига асосан жиноят ишининг айрим эпизодлари бўйича Жиноят кодексининг 139-моддаси (туҳмат) 2-қисми ва 165-моддаси (товламачилик) 3-қисми “а” бандида назарда тутилган жиноятларни содир этишда айбсиз деб топилиб, реабилитация этилган (оқланган). Х.Д. Жиноят кодексининг 139-моддаси 2-қисми, 165-моддаси 3-қисми “а” банди, 184-моддаси (солиқлар ёки йиғимларни тўлашдан бўйин товлаш) 3-қисми ва 243-моддаси (жиноий фаолиятдан олинган даромадларни легаллаштириш)да назарда тутилган жиноятларни содир этганликда айбли деб топилиб, унга Жиноят кодексининг 59 (бир неча жиноят содир этганлик учун жазо тайинлаш) ва 61 (жазоларни қўшишнинг ҳисоблаш қоидалари) моддалари тартибида 3 йилга оммавий ахборот воситаларида ишлаш ҳамда журналистика ва блогерлик фаолияти билан шуғулланиш ҳуқуқидан маҳрум қилган ҳолда базавий ҳисоблаш миқдорининг 300 баравари миқдорида жарима ва 7 йил муддатга озодликдан маҳрум қилиш жазолари тайинланганди. Тайинланган озодликдан маҳрум қилиш жазоси умумий тартибли колонияларда ўталиши белгиланганди.

Нима бўлган эди?

Январь ойида “Human.uz” нашри директори Хуршид Далиев, бош муҳаррири Муслим Мирзажонов ва сайтнинг бошқа ходимлари қўлга олинганди. ДХХ органлари томонидан берилган маълумотга кўра, фуқаро I.А.дан келиб тушган мурожаатга асосан фуқаро Д.Х. ва бошқаларнинг Telegram мессенжеридаги “Компромат.узб”ва бошқа каналлар орқали амалга оширилган жиноятларга алоқадорликлари сабабли уларга нисбатан Жиноят кодексининг 165-моддаси (товламачилик) 2-қисми “в” банди (бир гуруҳ шахслар томонидан олдиндан тил бириктириб содир этилган) билан жиноят иши қўзғатилганди.

“Қийноқ бўлмади”

Хуршид Далиев “Дарё” мухбирига соғлиғи меъёрида экани, шифокорлар томонидан етарлича кўрик ўтказилаётганини айтди.

“Ҳозир соғлиғим жойида. Ҳибсхонада зарурий шароитлар яратилган. Кунига уч маҳал овқат берилади. Шифокорлар ҳар куни икки маҳал хабар олади”, – дейди журналист.

Унинг қўшимча қилишича, тергов жараёни қонуний ва адолатли кечмоқда.

“Адвокат билан учрашиш имкони бор. Менга нисбатан ҳеч қандай босим ёки қийноқ бўлмади. Умуман олганда, соғлиғим, бу ердаги шароит ва қонуний ҳуқуқларим борасида шикоятим йўқ. Ҳаммаси ўз ўрнида таъминланмоқда”, — дейди Хуршид Далиев.

“Дарё” мухбири Хуршид Далиев билан ўзаро мулоқотда унда қийноқ ёки руҳий босимлар аломатини кўрмади.

Аввалроқ “Human.uz” нашри журналистларининг қўлга олиниши ортидан Миллий масс-медиани қўллаб-қувватлаш ва ривожлантириш жамоат фонди баёнот бериб, ушбу ҳолатдан хавотир билдирганди. Шунингдек, Ахборот ва оммавий коммуникациялар агентлиги “Human.uz” веб-сайти блокланмаганини маълум қилган.