Россия президенти Владимир Путин бугун (14 декабрь) йил якунларини сарҳисоб қилар экан, “руслар ва украинлар бир халқ” эканини айтиб, Украинанинг Одессасини “Россия шаҳри” деб атади. Бу ҳақда “РИА Новости” хабар берди.
“Асосан руслар ва украинлар бир халқ ва ҳозир содир бўлаётган нарса, биродарлар ўртасидаги фуқаролар урушига ўхшаш катта фожиадир, ака-ука қарама-қарши томонларда”, — деди Путин.
Шунингдек, у Украина жанубидаги шаҳарни русларники деб ҳам атаган.
“Одесса, умуман, Россия шаҳри, биз буни биламиз”, — деди у. Бундан ташқари, Россия президентининг сўзларига кўра, Украина ҳудудларининг жануби-шарқий қисми ҳамиша россияпараст бўлиб келган ва на Қрим, на Қора денгиз минтақасининг Украинага ҳеч қандай алоқаси йўқ.
“Қримнинг ҳам, Қора денгиз минтақасининг ҳам бунга алоқаси йўқ..., улар ҳар хил тарихий бемаъниликларни ўйлаб топишган”, — деди у ва бу ҳудудларни Владимир Ленин Украинага ўтказганини қўшимча қилди.
Шу билан бирга, Россия президенти Украинадаги “махсус ҳарбий зонада” 600 мингдан ортиқ рус ҳарбийси борлигини айтди.
“Хизматга чақирилган йигитлар яхши жанг қилмоқдалар, сафарбар қилинганлар орасидан 14 нафари Россия қаҳрамонлари, ‘махсус ҳарбий зонада’ 244 минг киши бор”, — деди у.
Маълумот ўрнида, Украинанинг қуруқликдаги кучлари сони ҳозирда 600 минг кишини ташкил қилади.
Изоҳ (0)