АҚШ Молия вазирлиги Қирғизистон ва Тожикистон компанияларига Россияга урушда фойдаланиладиган ресурс ва қурилмалар етказиб бергани учун санкциялар киритди.
Санкциялар рўйхатига турли мамлакатлардан жами 100 дан ортиқ жисмоний ва юридик шахслар киритилган. Қирғизистонда рўйхатдан ўтган Wеitmann Handeln Allianz ҳам санкциялар остида қолди.
Weitmann Россияга маълумотларни автоматик қайта ишлаш машиналари ва дискли сақлаш қурилмаларининг юзлаб партияларини юборган.
Санкциялар Тожикистонда жойлашган “Кафолати Комил” компаниясига ҳам тааллуқли бўлиб, АҚШ расмийларига кўра, у БАА орқали Россияга хорижда ишлаб чиқарилган авиация эҳтиёт қисмларини жўнатган.
АҚШ Марказий Осиёдаги компанияларга нисбатан киритган сўнгги санкциялар:
- Июль ойида Россия мудофаа саноати эҳтиёжлари учун Россияга электроника ва бошқа маҳсулотлар етказиб берган Қирғизистоннинг тўртта компанияси Америка санкциялари остида қолганди.
- Август ойида Қўшма Штатлар Қозоғистонда рўйхатдан ўтган Defense Engineering компаниясини Шимолий Корея ва Россия ўртасидаги қурол-яроғ етказиб бериш бўйича келишувлардаги иштироки учун санкциялар рўйхатига киритган.
- Ноябрь ойида АҚШ Ўзбекистоннинг Mvizion компаниясига нисбатан санкциялар киритди. АҚШ Савдо вазирлиги маълумотларига кўра, бу чекловлар Россия Қуролли кучлари учун дрон ишлаб чиқариш билан боғлиқ.
Изоҳ (0)