Ўзбекистоннинг барча ҳудудларида агрегаторлар ва такси хизматларини фискаллаштириш кўзда тутилган. Бу ҳақда Солиқ қўмитаси хабар берди.
Маълум қилинишича, Солиқ органлари томонидан солиқ базасини кенгайтириш ва яширин иқтисодиёт улушини қисқартириш бўйича тизимли ишлар давом эттирилмоқда. Ушбу чора-тадбирлардан бири такси ва йўловчи ташиш бозорини тартибга солишдир.
1 декабрдан бошлаб Yandex Gо хизмати Ўзбекистонда ўз фаолиятини маҳаллийлаштириб, солиқ резидентига айланганди. Қўмитанинг билдиришича, мазкур сервис Солиқ ахборот тизимлари билан интеграция қилиниши натижасида ҳар бир ташиш хизмати учун фискал чек шакллантириш имконияти яратилди. 1—6 декабрь кунлари 13,5 миллиард сўмлик 800 483 та чек шакллантирилди.
Солиқ қўмитаси ўз навбатида, мазкур соҳада бир қатор ечимини топиши лозим бўлган масалалар сақланиб қолаётганини ҳам қайд этиб ўтди.
Биринчидан, такси хизмати (Yandex Gо ва бошқалар) учун нақд пул орқали тўлов қилинганда чек берилиши йўлга қўйилмаган. Бу борада амалиётга татбиқ этиш учун бир нечта ечимлар ишлаб чиқилди ва бозор иштирокчиларига таклиф қилинди, яқин кунларда нақд пул орқали тўлов қилинганида ҳам чек берилиши таъминланади.
Иккинчидан, қолган агрегаторларда, хусусан – MyTaxi, Uklon ва бошқаларда фискал чек бугунги кунгача шакллантирилмаяпти. Ушбу агрегаторлар билан техник интеграциялаш ишлари якунланган ва яқин кунларда йўловчилар ушбу хизматлардан фойдаланганда фискал чекларни олишни бошлаши кутилмоқда.
Шу билан бирга йўловчи ташиш бозорида, турли баҳолашларга асосан 500 мингдан 1 миллион нафаргача фуқаро тўлиқ ёки қисман бандлигини, шунингдек, таксиларнинг кундалик логистика ва ҳаракатланишдаги аҳамияти катта эканини ҳисобга олиб, мазкур соҳадаги муносабатларни автоматлаштириш ва фискаллаштириш жараёнини босқичма-босқич ва эҳтиёткорлик билан амалга ошириш зарур, деб ҳисоблаймиз, — дейилади хабарда.
Бундан ташқари, республиканинг барча ҳудудларида агрегаторлар ва такси хизматларини фискаллаштириш кўзда тутилган.
Учинчидан, бугунги кунга қадар шакллантирилган 13,5 миллиард сўмлик 800 483 та чекларнинг 13,4 миллиард сўмлик 791 100 таси 232 та юридик шахслар (Yandex Gо ҳамкорлари ва такси компаниялари), 163,9 миллион сўмлик 9 383 таси эса 1 821 нафар ўзини ўзи банд қилган шахслар ҳиссасига тўғри келади. Бунда, ташиш хизмати ўзини ўзи банд қилган ҳайдовчи томонидан кўрсатилган бўлсада, ташишнинг барча суммаси таксопарк (ҳамкор) айланмасида акс этиш ҳолатлари Солиқ қўмитаси томонидан кузатилмоқда.
Мазкур йўналишда таксопарклар ва ўзини ўзи банд қилган ҳайдовчилар ўртасида солиқ тўловчининг шахсий кабинетида комиссионер ва комитентни тўғри белгилаш бўйича тушунтириш ишлари агрегаторлар билан биргаликда олиб борилмоқда. Шунингдек, ушбу соҳада ўзини ўзи банд қилган фуқароларга қулайлик яратиш мақсадида мазкур функцияни Солиқ мобил иловасига қўшиш орқали соддалаштириш бўйича ишлар олиб борилмоқда.
Хабарда таъкидланишича, Солиқ қўмитаси такси хизматини кўрсатишда агрегаторлар ва уларнинг ҳамкорлари бизнес жараёнларини мониторинг қилиб бормоқда ва аниқ ечимларни таклиф этади.
Изоҳ (0)