Қизилўнгач саратони ошқозон-ичак трактининг энг кенг тарқалган хавфли шишидир. Ҳар йили дунё бўйлаб 16 мингта янги ҳолат қайд этилмоқда, ҳар бир давлатда ушбу касалликнинг тарқалиши доимий равишда ўсиб бормоқда.
Эркаклар қизилўнгач саратонига аёлларга қараганда 3,5 марта кўпроқ чалинади, энг юқори кўрсаткич 50—59 ёшда бўлади. Қачон қизилўнгач саратонининг эрта белгиларига эътибор бериш ва дарҳол шифокор билан маслаҳатлашингиз кераклиги ҳақида гаплашамиз.
Оғриқли ёки қийин ютиниш
Қизилўнгач — оғиз ва ошқозонни боғлайдиган найча. Агар унда шиш пайдо бўлса, бемор овқат ютишда қийиналади. Шифокорларнинг таъкидлашича, биринчи қийинчиликлар одатда қаттиқ озиқ-овқат — гўшт ёки нонни ютиш билан бошланади. Оғриқ бўлиши мумкин. Агар шифокорга мурожаат қилмасангиз ва ҳеч қандай чора кўрмасангиз, юмшоқ овқатлар ва ҳатто суюқликларни ютишда ҳам қийинчиликлар пайдо бўлиши мумкин.
Жиғилдон қайнаши ва кислота оқимининг кучайиши
Кўпчилик вақти-вақти билан кўнгил айнишини бошдан кечиради, баъзиларни ошқозон кислотаси ошиши қийнаса, айримлар овқатнинг ошқозондан қизилўнгачга қайтиб чиқишидан азият чекади. Бу муаммолар тез-тез бўлса ёки аҳвол ёмонлашса, қизилўнгач саратонининг аломати бўлиши мумкин.
Овқатдан кейинги йўтал
Бу, айниқса, қизилўнгач саратонига айланиши мумкин бўлган гастроэзофагиал рефлюкс касаллиги ёки Барретт қизилўнгачи ташхиси қўйилган одамларда кузатилади. Айниқса, “оғир” овқат истеъмол қилгандан кейинги йўталиш саратон ривожланишининг аломати бўлиши мумкин.
Вазн йўқотиш
Сабабсиз вазн йўқотиш кўпинча саратоннинг кўплаб шаклларига, шу жумладан, қизилўнгач саратонида ҳам кузатилади: одатда овқатни ютиш қийин бўлган одамлар уни емай қўяди. Ёки ошқозони камроқ оғриши учун камроқ овқатланишга ҳаракат қилади ва шу сабаб улар вазн йўқотади. Агар ҳеч қандай ҳаракатсиз вазн йўқотаётган бўлсангиз, шифокор билан маслаҳатлашинг, бу жуда жиддий бўлиши мумкин.
Қаттиқ чарчоқ
Саратон касаллигининг яна бир “универсал” аломати — ўзини жуда чарчаган ҳис қилиш. Агар тез чарчай бошласангиз, кундалик машғулотлар жуда кўп энергия талаб қилса, шифокорга боришни кечиктирманг. Касаллик қанчалик тез аниқланса, даволаниш эҳтимоли шунчалик юқори бўлади.
Изоҳ (0)