Qizilo‘ngach saratoni oshqozon-ichak traktining eng keng tarqalgan xavfli shishidir. Har yili dunyo bo‘ylab 16 mingta yangi holat qayd etilmoqda, har bir davlatda ushbu kasallikning tarqalishi doimiy ravishda o‘sib bormoqda.
Erkaklar qizilo‘ngach saratoniga ayollarga qaraganda 3,5 marta ko‘proq chalinadi, eng yuqori ko‘rsatkich 50—59 yoshda bo‘ladi. Qachon qizilo‘ngach saratonining erta belgilariga e’tibor berish va darhol shifokor bilan maslahatlashingiz kerakligi haqida gaplashamiz.
Og‘riqli yoki qiyin yutinish
Qizilo‘ngach — og‘iz va oshqozonni bog‘laydigan naycha. Agar unda shish paydo bo‘lsa, bemor ovqat yutishda qiyinaladi. Shifokorlarning ta’kidlashicha, birinchi qiyinchiliklar odatda qattiq oziq-ovqat — go‘sht yoki nonni yutish bilan boshlanadi. Og‘riq bo‘lishi mumkin. Agar shifokorga murojaat qilmasangiz va hech qanday chora ko‘rmasangiz, yumshoq ovqatlar va hatto suyuqliklarni yutishda ham qiyinchiliklar paydo bo‘lishi mumkin.
Jig‘ildon qaynashi va kislota oqimining kuchayishi
Ko‘pchilik vaqti-vaqti bilan ko‘ngil aynishini boshdan kechiradi, ba’zilarni oshqozon kislotasi oshishi qiynasa, ayrimlar ovqatning oshqozondan qizilo‘ngachga qaytib chiqishidan aziyat chekadi. Bu muammolar tez-tez bo‘lsa yoki ahvol yomonlashsa, qizilo‘ngach saratonining alomati bo‘lishi mumkin.
Ovqatdan keyingi yo‘tal
Bu, ayniqsa, qizilo‘ngach saratoniga aylanishi mumkin bo‘lgan gastroezofagial reflyuks kasalligi yoki Barrett qizilo‘ngachi tashxisi qo‘yilgan odamlarda kuzatiladi. Ayniqsa, “og‘ir” ovqat iste’mol qilgandan keyingi yo‘talish saraton rivojlanishining alomati bo‘lishi mumkin.
Vazn yo‘qotish
Sababsiz vazn yo‘qotish ko‘pincha saratonning ko‘plab shakllariga, shu jumladan, qizilo‘ngach saratonida ham kuzatiladi: odatda ovqatni yutish qiyin bo‘lgan odamlar uni yemay qo‘yadi. Yoki oshqozoni kamroq og‘rishi uchun kamroq ovqatlanishga harakat qiladi va shu sabab ular vazn yo‘qotadi. Agar hech qanday harakatsiz vazn yo‘qotayotgan bo‘lsangiz, shifokor bilan maslahatlashing, bu juda jiddiy bo‘lishi mumkin.
Qattiq charchoq
Saraton kasalligining yana bir “universal” alomati — o‘zini juda charchagan his qilish. Agar tez charchay boshlasangiz, kundalik mashg‘ulotlar juda ko‘p energiya talab qilsa, shifokorga borishni kechiktirmang. Kasallik qanchalik tez aniqlansa, davolanish ehtimoli shunchalik yuqori bo‘ladi.
Izoh (0)