“Солиқ органлари томонидан айрим солиқ ҳисоботларини шакллантириш тартиби жорий этилганлиги муносабати билан Ўзбекистон Республикаси ҳукуматининг айрим қарорларига ўзгартириш ва қўшимчалар киритиш” ҳақидаги Вазирлар Маҳкамаси қарори қабул қилинди.
Ҳужжат билан солиқ органларининг айрим солиқ ҳисоботларини шакллантириши тўғрисидаги қарор тасдиқланди. Бу Солиқ кодексининг 81-моддасида назарда тутилган.
2024 йил 1 январдан солиқ органлари тадбиркорларнинг истагига кўра, юридик шахсларнинг қўшилган қиймат солиғи (ҚҚС), айланма солиғи, мол-мулк солиғи ва ер солиғи бўйича ҳисоботларни шакллантириши мумкин бўлади.
Ҳужжатлар автоматик тарзда тайёрланади. Ҳисоботларни тайёрлаш учун ички манбалар (солиқ тўловчининг солиқ ва молиявий ҳисоботлари, электрон ҳисоб-фактуралар, онлайн назорат-касса машиналари, онлайн чеклар ва бошқалар) маълумотлари билан бир қаторда ташқи манбалардан (бошқа давлат органлари тизимлари) ҳам фойдаланилади.
Ҳисобот солиқ тўловчининг шахсий кабинетида акс этади. У ёки унинг ваколатли вакили тузилган ҳисоботнинг тўғрилиги ва тўлиқлигини тасдиқлаши ёки ҳужжатни қайта расмийлаштириб, солиқ органларига тақдим этиши керак бўлади.
2022 йилда бу амалиёт тажриба тариқасида Хоразм вилоятида синаб кўрилган. Бундан ташқари, савдо квитансияларини беришда техник хатоларни тузатиш муддати белгиланган. Агар бунга қадар тузатишни кейинги ойнинг 10-кунидан кечиктирмасдан киритиш мумкин бўлса, 20 октябрдан бошлаб ҳисобот даврининг охиригача вақт ажратилади.
Аввалроқ Ўзбекистонда солиққа оид ҳуқуқбузарликлар учун молиявий санкциялар фақат суд томонидан қўлланилиши тўғрисида хабар берилганди.
Изоҳ (0)