“Тадбиркорлик фаолиятини давлат томонидан тартибга солиш тизими соддалаштирилганлиги муносабати билан Ўзбекистон Республикаси ҳукуматининг айрим қарорларига ўзгартириш ва қўшимчалар киритиш тўғрисида”даги Вазирлар Маҳкамаси қарори қабул қилинди.
Қайд этилишича, 2022 йилнинг ноябрь ойида Тадбиркорлик фаолиятини давлат томонидан тартибга солишни соддалаштириш тўғрисидаги президент фармони қабул қилинган. Вазирлар Маҳкамасининг 2023 йил 14 августдаги қарори эса норматив-ҳуқуқий ҳужжатларни фармондаги янгиликлар билан мувофиқлаштирган.
Ҳужжатга мувофиқ энди тадбиркорлар учун 2023 йил 1 январдан бошлаб кучга кирган соддалаштирилган тартиб тегишли қарорларда ҳам акс эттирилган:
- Ўзбекистонда чакана савдо қоидаларининг 119-бандидан янги импорт автомобилларнинг фақат юридик шахслар — ишлаб чиқарувчи корхоналарнинг расмий дилерлари томонидан сотилишига йўл қўйган норма чиқариб ташланди. Энди мазкур фаолият тури билан шуғулланадиган тадбиркорлик субъектлари сони ошади;
- 2004 йил 1 ноябрдаги 511-сон ҳукумат қарори 3-бандидан электр энергиясини электр таъминоти шартномасида назарда тутилган ҳажмлардан ортиқча истеъмол қилган юридик шахсларга электр энергияси етказиб беришни тақиқловчи норма чиқариб ташланди;
- тадбиркорлик субъектларини давлат рўйхатидан ўтказиш тартиби тўғрисида низомнинг давлат рўйхатидан ўтказишни, қайта рўйхатдан ўтказишни рад этиш учун асослар келтириб ўтилган 40-бандидан “устав фондининг миқдори камайтирилганда корхона кредиторлари белгиланган тартибда хабардор қилинмаганлиги” асоси чиқариб ташланди. 1 январдан бошлаб президент фармони билан устав фондини (устав капиталини) камайтириш тўғрисида кредиторларни ёзма равишда хабардор қилиш ва ОАВда бу ҳақда эълон бериш талаби бекор қилинди.
Солиқ текширувларини ташкил этиш ва ўтказиш тартиби тўғрисида низом тўртта янги банд билан тўлдирилди: 121-1, 121-2, 241-1 ва 241-2. Уларда 2023 йил - мартдан бошлаб кучга кирган норма ёзилган. Тадбиркорлик субъекти солиқ органларининг сайёр солиқ текшируви ва солиқ аудити натижалари бўйича қабул қилган қарорлари устидан шикоят қилиш учун тўғридан тўғри судга мурожаат қилиши мумкин (юқори турувчи солиқ органини четлаб ўтган ҳолда).
Август бошларида Шавкат Мирзиёев раислигида ўтказилган йиғилишда тадбиркорлар ер ва мол-мулк солиқлари бўйича ҳисобот топширмаслиги белгиланганди. Июль ойида эса Ўзбекистон ҳукумати қарори билан “20 минг тадбиркор — 500 минг малакали мутахассис” дастури доирасида тадбиркорлик субъектларига солиқ ва божхона имтиёзлари ҳамда преференцияларни қўллаш тартиби тўғрисида”ги низом қабул қилинганди.
Низомга кўра, Ижтимоий ҳимоя ягона реестрига киритилган фуқаролар камида 1 йил давомида иш билан таъминланган ва улар жами ишчилар сонининг камида 20 фоизини ташкил этган тадбиркорлар мол-мулк ва ер солиғи бўйича солиқ имтиёзларидан фойдаланиш ҳуқуқига эга бўлади.
Изоҳ (0)