Криштиану Роналду, Карим Бензема ёки Неймар Ўзбекистонга келиши мумкин. ОЧЛ плей-оффига чиққан жамоалар саватчаларга ажратилди

Футбол бўйича Осиё Чемпионлар Лигаси ғарб минтақасида 1/8 финал йўлланмасини қўлга киритган барча жамоалар номи маълум бўлди.

Плей-офф босқичида “Навбаҳор” ва “Насаф” Ўзбекистон шарафини ҳимоя қилади. Шунингдек, “Ал-Айн”, “Ал-Иттиҳод”, “Ал-Ҳилол”, “Ан-Насср”, “Сепахон” ва “Ал-Файҳа” ҳам кейинги босқичга йўлланма олди.

Жамоалар саватчаларга ажратилди: 

1-саватча: 

“Ал-Ҳилол” (Саудия Арабистони)
“Ан-Насср” (Саудия Арабистони)
“Ал-Иттиҳод” (Саудия Арабистони)
“Ал-Айн” (БАА)

2-саватча: 

“Насаф” (Ўзбекистон)
“Навбаҳор” (“Ўзбекистон”)
“Сепахон” (Эрон)
“Ал-Файҳа” (Саудия Арабистони).

1-саватчадан энг яхши натижага эга бўлган, гуруҳда 1-ўринни эгаллаган жамоалар жой олди. 2-саватчага эса энг ёмон натижа қайд этган гуруҳ пешқадами ва 2-ўрин билан чиққан энг яхши 3 та жамоа жойлашди. “Насаф” гуруҳда 1-ўринни олган жамоалар ичида энг кам очко тўплаганлиги сабабли, 2-саватчага киритилган.

Шунга кўра, Карим Бензема, Неймар ёки Роналдунинг Қаршига келиш эҳтимоли юқори.

Бир гуруҳдан жой олган жамоалар плей-оффда ўзаро кураш олиб бормаслигини инобатга олсак, “Навбаҳор” 1-саватчадаги “Ал-Ҳилол” билан баҳс олиб бормайди. Шу сабабдан “Ан-Насср”нинг Наманган жамоаси билан тўқнаш келиш эҳтимоли бор. 

Ҳар қандай ҳолатда ҳам Саудиянинг юлдузли клубларидан бири 1/8 финалда Ўзбекистонга ташриф буюради.