Беларусь Тошкентда трамвайни тиклаш лойиҳасида иштирок этишни режалаштирмоқда. Бу ҳақда «Иннопром: Марказий Осиё» халқаро кўргазмасида иштирок этиш учун Тошкентга келган мамлакат бош вазири Роман Головченко Ўзбекистон бош вазири Абдулла Арипов билан учрашувда маълум қилди, деб хабар беради «Белта» агентлиги.
Тошкентда трамвай қатновларини қайта тиклаш имкониятлари кўриб чиқилмоқда.
«Беларусь томони зарур инфратузилма, режалаштириш ва ҳаракат таркибини етказиб бериш билан боғлиқ комплекс ечимларни тақдим этишга тайёр. Бу каби қарор қабул қилинса, Ўзбекистонда ҳам ишлаб чиқариш имкониятларини кўриб чиқамиз», — дейди Головченко.
Бундан ташқари, ҳукумат раҳбарлари таълим, илмий-техника ва инновацион соҳадаги ҳамкорликни муҳокама қилган. 2021 йилда Беларусь ва Ўзбекистон ўртасидаги товар айланмаси 301,9 миллион долларни ташкил этган — бу 2020 йилга нисбатан 7,8 фоизга кўп демак. Экспорт ҳажми 245,4 миллион доллар (ўсиш 3,3 фоиз), ижобий салдо — 188,9 миллион долларга етган.
Эслатиб ўтамиз, 2016 йилнинг 2 май куни Тошкентда ҳаракатланаётган сўнгги трамвай йўналиши — «Бешқайрағоч» даҳаси ва «Ипподром» ўртасида қатновчи 17-йўналиш ёпилганди.
Шавкат Мирзиёев 2022 йил 19 январь куни Тошкент шаҳрида жамоат транспортини ривожлантириш чора-тадбирлари бўйича тақдимот билан танишганди. «Менимча» кўрсатувида транспорт вазирининг тақдимоти президентга маъқул бўлмагани ҳақида сўз борган. Айнан ушбу кўрсатувда тележурналист Хайрулла Нуриддинов Тошкентга трамвай қатновини қайтариш тарафдори эканини айтиб ўтган эди. Давлат раҳбари 10 февраль куни Самарқанд вилоятига ташрифи давомида фуқаролар мурожаати сабаб трамвайни Тошкентга қайтаришни айтиб ўтганди. «Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — деган эди президент.
Тошкент шаҳар ҳокими ўринбосари Бахтиёр Раҳмонов 16 февраль куни пойтахт ҳокимлигида бўлиб ўтган матбуот анжуманида Навоий кўчасида трамвай бўлмаслигини айтган эди. Транспорт бошқарма бошлиғи Анвар Жўраев эса трамвай бўйича таклифлар борлигини билдирганди.
Изоҳ (0)