Ўзбекистонда базавий ҳисоблаш миқдорининг камида бир баробари миқдорида ижтимоий солиқ тўлови тўлаган фуқарога 1 йиллик иш стажи ҳисобланади. Бу ҳақда Пенсия жамғармаси маълум қилди.
“Фуқароларнинг давлат пенсия таъминоти тўғрисида”ги қонун билан эркаклар 60 ёшга, аёллар 55 ёшга тўлганда ва меҳнат стажи камида 7 йил бўлганда тўлиқсиз ёшга доир пенсия тайинланиши белгилаб қўйилган.
Фуқаро Ўзбекистон президентнинг 2020 йил 8 июндаги қарорида белгиланган 101 турдаги меҳнат фаолияти билан шуғулланса ҳамда ўрнатилган тартибда ўз-ўзини банд қилган шахс сифатида рўйхатдан ўтиб, БҲМнинг камида бир баробари миқдорида (340 минг сўм) ижтимоий солиқ тўласа, унга бир йиллик иш стажи ҳисобланади.
Демак, фуқаро 7 йил давомида ҳар йили Пенсия жамғармасига ўз-ўзини банд қилган фуқаро сифатида ижтимоий солиқ тўловини амалга оширган тақдирда, келгусида пенсия олиш ҳуқуқига эга бўлади —дея маълум қилди жамғарма.
Ҳозирги кунда иш стажи тўлиқ бўлмаган чоғдаги ёшга доир пенсиянинг энг кам миқдори (қўшимча тўловни ҳисобга олган ҳолда) ойига 608 000 сўмни ташкил этади.
Пенсия миқдори иш ҳақи ва иш стажига боғлиқ. Яъни фуқаро ижтимоий солиқни қанча кўп тўласа, пенсия миқдори ҳам шунча юқори бўлади.
Ушбу турдаги ижтимоий солиқни тўлаб меҳнат стажига эга бўлмоқчи бўлган фуқаролар ўз яшаш жойларидаги Давлат хизматлари марказига ва Солиқ органларига бевосита ташриф буюрган ҳолда ёки Ягона интерактив давлат хизматлари портали орқали онлайн мурожаат қилишлари мумкин.
Изоҳ (0)