Ўзбекистонда пенсия ва нафақаларнинг декабрдаги тўлови ҳақида маълумот берилди

Мамлакатда 2023 йил декабрь ойи учун пенсия ва нафақа тўловлари тўлиқ молиялаштирилди. Бу ҳақда Пенсия жамғармаси хабар берди.

 

Қайд этилишича, жамғарма томонидан жорий йилнинг ноябрь ойи тўлов рўйхатларига киритилган 4,6 миллион нафар пенсия ва нафақа олувчилар учун талаб этилган маблағлар 5 декабрь кунига қадар тижорат банкларига тўлиқ ўтказиб берилди.

“Ўз навбатида 4 декабрь кунигача пенсия ва нафақа тўловларини нақд пулсиз шаклда олувчи 3,4 миллион нафар (ёки жами олувчиларнинг 74 фоизи) фуқароларнинг банк карталарига маблағлар тўлиқ юклаб берилиши таъминланди. Амалдаги қонунчилик талабларига мувофиқ, пенсия ва нафақа пулларини нақд шаклда олувчиларга жорий ой тўловлари тасдиқланган графикларга асосан Халқ банкининг сайёр кассалари томонидан етказиб берилишини маълум қиламиз”,— дейилади жамғарма хабарида.

Маълумот учун, айни пайтда республикада пенсияни ҳисоблашнинг базавий миқдори 372 минг сўм. Ёшга доир энг кам пенсия миқдори 725 минг сўмни, ногиронлик пенсияси 800 минг сўмни ташкил этмоқда.

2023 йил 1 июль ҳолатига кўра, энг юқори иш ҳақи билан пенсия (ҳисобланган) тайинланган фуқаролар 401,9 минг нафарни ва энг кам миқдорда пенсия олувчилар 652,9 минг нафарни ташкил этади.

Аввалроқ Пенсия жамғармаси “Дарё”га бугунги кунда давлат пенсияларининг барча турлари учун йиллик 53,5 триллион сўм тўланаётганини маълум қилганди. Бунда бир ойлик ўртача харажатлар миқдори қарийб 4,5 триллион сўмни ташкил этмоқда.