Ўзбекистонда банк карталари билан боғлиқ шубҳали операциялар содир этилганда улардан фойдаланиш 3 кунгача чекланиши мумкин.
Бу ҳақда “Рақамли маҳсулотлар (хизматлар) истеъмолчилари ҳуқуқларини ҳимоя қилиш ва рақамли технологиялар воситасида содир этиладиган ҳуқуқбузарликларга қарши курашишни кучайтириш чоралари тўғрисида”ги президент қарорида белгиланди.
Унда айтилишича, ўғрилик, фирибгарликка чек қўйиш учун Марказий банкка тижорат банклари, тўлов тизими операторлари ва тўлов ташкилотларига банк карталари билан боғлиқ шубҳали операциялар содир этилганда, банк карталари, банк ҳисобварақлари ва мобил иловалардаги ҳисобварақлардан фойдаланишни 3 кунгача чеклаш тўғрисида мажбурий кўрсатмалар бериш ваколати берилди.
Шунингдек, бир ой муддатда тижорат банклари, тўлов тизими операторлари ва тўлов ташкилотлари томонидан фуқароларга онлайн хизматлар кўрсатишда техник ҳимоя усулларини такомиллаштириш бўйича комплекс чора-тадбирлар ишлаб чиқиш юклатилди.
Замонавий таҳдидлар, банк карталари (карта реквизитлари) билан, шу жумладан электрон тўлов тизимлари орқали ноқонуний операцияларнинг олдини олиш учун аҳолининг рақамли молиявий саводхонлигини ошириш бўйича комплекс чора-тадбирлар ишлаб чиқиб, тасдиқлаш ҳам юклатилди.
Изоҳ (0)