Исроил ва ҲАМАС ўртасида сулҳнинг сўнгги кунида озод этилиши керак бўлганлар ва фаластинлик маҳбуслар рўйхати бўйича келишмовчилик юзага келди. Бу ҳақда BBC хабар берди.
Маълум қилинишича, қатарлик воситачилар Исроил ва ҲАМАС ўртасидаги келишмовчиликларни бартараф этиш устида ишламоқда. ҲАМАС Исроил қамоқхоналаридаги олти нафар фаластинлик аёлни озод қилишни талаб қилмоқда. Бироқ улар 27 ноябрь куни озод этиладиганлар рўйхатида йўқ.
Бу Исроил ва ҲАМАС ўртасида исроиллик гаровга олинганлар ва фаластинлик асирларни алмашиш доирасида юзага келган келишмовчиликларнинг сабабларидан бири бўлиши мумкин. Фаластин томонининг айтишича, 38 нафар фаластинлик аёлдан ҳозиргача 32 нафари қўйиб юборилган.
Бу Исроил қамоқхоналарида сақланаётган фаластинликларнинг ҳаммаси эмас, лекин, ҲАМАСга кўра, олти киши озод этилиши керак, чунки улар қамоқда энг узоқ вақт ўтирган. ҲАМАС Исроилни фаластинлик маҳбусларни озод қилишда ушбу тамойилга амал қилишга чақирмоқда.
Қатар расмийлари одамларни озод қилишда кечикишларнинг олдини олиш учун аллақачон жараёнга аралашганликларини айтмоқда.
- ҲАМАС 27 ноябрь, душанба куни 11 нафар исроиллик гаровга олинганларни озод қилиши керак. Исроил ҳукумати 26 ноябрь куни уларнинг рўйхатини қўлга киритган.
- 26 ноябрда ҲАМАС 14 нафар исроилликни, жумладан 4 ёшдан 17 ёшгача бўлган тўққиз нафар болани қўйиб юборди. Умуман олганда, сулҳнинг сўнгги уч кунида 39 нафар исроиллик уйига қайтди, 117 нафар фаластинлик эса Исроил қамоқхоналаридан озод қилинди.
Изоҳ (0)