Футбол бўйича Осиё Чемпионлар Лигасининг 5-турида “Насаф” 27 ноябрь, душанба куни “Ал-Файсали”га қарши баҳс олиб боради.
Учрашув олдидан жамоалар бош мураббийлари матбуот анжуманида иштирок этди.
Чемпионлар лигаси гуруҳ босқичида ҳал қилувчи палла бошланди. Мавсум аввалидаёқ мақсад сифатида кейинги босқич йўлланмаси қўйилган эди. Фақат ғалаба учун майдонга чиқамиз. Тақвим тиғизлигига аллақачон кўникиб бўлдик. Сиз халқаро майдонда ўйнашни хоҳласангиз, шундай бўлиши табиий. Муҳими, барча йигитлар бўлажак ўйинга шай ҳолатда. Фақатгина дисквалификация туфайли Алибек Давроновнинг хизматидан фойдалана олмаймиз.
Рақиб Иорданиянинг энг кучли жамоаси ва фақат тажрибали ўйинчилардан тузилган. Уларнинг “Шаржа” ва “Ас-Садд” жамоасидан фарқи битта футболчига боғланиб қолмаган. Шунингдек, жисмоний жиҳатдан жуда яхши шаклланган. Бу жамоани енгиш учун катта меҳнат қилишимиз керак бўлади.
Мухлисларнинг қўллаб-қувватлаши жамоага куч беради. Стадионда ажойиб атмосфера бўлади деган умиддамиз.
Рўзиқул Бердиев, “Насаф” бош мураббийи
“Насаф”га қарши яхши ўйин кўрсатиш учун келдик. Учрашувга кўнгилдагидек тайёрландик. Шогирдларим ҳам берилган кўрсатмаларни тўғри бажариб, қониқарли натижа кўрсатишларига умид қиламан. Ўйин олдингиларига ўхшамаслиги табиий.
Аҳмад Ҳаел, “Ал-Файсали” бош мураббийи
Эслатиб ўтамиз, “Ал-Файсали” B гуруҳида энг охирги ўринни эгаллаб турибди. Жамоа 4 турдан сўнг 3 очко жамғарган. “Насаф” эса 7 очко билан 2-ўринда бормоқда.
Изоҳ (0)