Тошкент шаҳар Чилонзор туманида қалбаки акциз маркали алкогол маҳсулотлари ишлаб чиқарилаётгани аниқланди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Хабарга кўра, Бош прокуратура ҳузуридаги департаментнинг Тошкент шаҳар бошқармаси ва Чилонзор туман бўлими томонидан туман Солиқ инспекцияси ходимлари билан ҳамкорликда ўтказилган тезкор тадбирда “Р.Б.” МЧЖга қарашли савдо дўкони сотувчиси Ж.Н. харидор А.А.га қалбаки QR-код маркировкали 210 дона “Aurum” номли алкогол маҳсулотини 3,9 миллион сўмга сотган вақтида ушланиб, ушбу дўкондан 3 хил турдаги “Асл биллур” МЧЖ томонидан ишлаб чиқарилган қалбаки акциз маркали жами 6 370 дона алкоголли маҳсулотлари ашёвий далил сифатида олинган.
Шунингдек, тадбир давомида Чилонзор туманидаги “Асл биллур” МЧЖнинг ишлаб чиқариш цехи ва омборхонаси кўздан кечирилганида хуфиёна тарзда ишлаб чиқарилиб, сотиш учун тайёрлаб қўйилган жами 16 715 дона қалбаки акциз маркали алкоголли маҳсулотлар сақланаётгани аниқланган.
Бундан ташқари, “Асл биллур” МЧЖ масъул шахслари ва бошқалар алкогол маҳсулотлари ишлаб чиқариш учун этил спиртини биржа савдолари орқали сотиб олмасдан, суриштирув давомида шахсини аниқлаш имкони бўлмаган шахслардан нақд пулга сотиб олиб реализация қилганликлари маълум бўлган.
Мазкур ҳолатлар юзасидан Жиноят кодексининг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш), 192-11-моддаси (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)