Тахминан 400 миллион доллар Буюк Британия кафолати остида Жаҳон банки (ЖБ) траст фонди орқали Украина давлат бюджетига тушди. Бу ҳақда Украина Молия вазирлиги сайтида маълум қилинди.
Украина давлат бюджетига Буюк Британиядан Жаҳон банки траст фонди орқали кафолатланган 400 миллион долларга яқин маблағ тушди. Тўпланган маблағлар “Украинада барқарор давлат бошқарувини таъминлаш учун давлат харажатларини қўллаб-қувватлаш” лойиҳасини қўшимча молиялаштиришга сарфланади, дейилади хабарда.
Маблағ пенсия тўловларини қисман қоплаш ва тиббиёт ходимларининг иш ҳақини тўлашга йўналтирилади. “Кредит имтиёзли шартларда берилади, тўлаш муддати 5 йиллик имтиёзли давр билан 19 йилни ташкил этади”, — дейилади вазирлик хабарида.
25 сентябрь куни Украина Молия вазирлиги Британия кафолати остида Жаҳон банкидан 100 миллион доллар олгани ҳақида хабар берганди. Департаментнинг аниқлик киритишича, маблағлар 2023 йил июль ойи учун пенсия тўловларини амалга ошириш учун қилинган давлат бюджети харажатларини қисман қоплашга йўналтирилади.
Изоҳ (0)