“Док-1 Макс” судига гувоҳликка чақирилган уч кишига жиноят иши очиш сўралди. Суд мазкур илтимосномани муҳокама қилади

Тошкент шаҳар судининг Жиноят ишлари бўйича судлов ҳайъати томонидан салкам тўрт ойдан бери кўриб чиқилаётган “Док-1 Макс” судининг 22 ноябрь куни давом этган навбатдаги мажлисида судга чақирилган гувоҳларга қарши жиноят иши очиш сўралди. Бу ҳақда судда қатнашган “Дарё” журналисти хабар берди. 

Бу ҳақидаги илтимосномалар судлов ҳайъатига Фармацевтика агентлигининг собиқ раҳбари С.К.нинг адвокати Темур Раҳматов томонидан киритилди. 

Жиноят процессуал кодексининг 417-моддасига асосан учта илтимоснома киритмоқчиман. Биринчиси судда сўроқ қилинган Улуғбек Эгамовга (Фармацевтика агентлигининг собиқ раҳбари С.К.нинг биринчи ўринбосари сифатида, кейинчалик Фармацевтика агентлиги директори сифатида ишлаган) нисбатан жиноят иши очиш ҳақида прокуратурага хабарнома бериш тўғрисидаги илтимоснома. Судда сўроқ қилинган гувоҳнинг ҳаракатларида жиноят аломатлари аниқланса, суднинг бу ҳақида хабарнома бериб, ажрим чиқариши кўзда тутилган. Улуғбек Эгамовнинг дастлабки терговдаги кўрсатмалари, шунингдек, судланувчи А.А.нинг унга нисбатан берган кўрсатмасидан хулоса қиладиган бўлсак, Улуғбек Эгамов А.А.га хизмат ваколатига кирмаган иш бўйича топшириқ (“Кураракс” дорисини инспексион текширувдан олиш бўйича) бергани, Telegram даги ёзишмаларидан ҳам аниқланган. Бу ҳақда скриншотлар бор. Нимагадир дастлабки тергов Эгамовга нисбатан жиноят иши қисмини бекор ҳам қилмаган. Бу жиноят процессуал қонунчилигининг қўпол бузилиши деб ҳисоблаймиз. Шу сабаб бу ҳақда прокурорга хабар бериш керак деб ўйлаймиз, — деди дастлабки илтимоснома ҳақида гапирган адвокат. 

Адвокат Темур Раҳматов илтимосномасини давом эттирар экан, яна бир гувоҳ Умид Темиров (Фармацевтика агентлигининг собиқ раҳбари С.К.нинг ёрдамчиси вазифасида ишлаган)га нисбатан ҳам жиноят иши очилишини сўради. 

Умид Темировга нисбатан Жиноят процессуал кодексининг 84-моддасига асосан дастлабки тергов қисмини бекор қилиш бўйича, яъни 209-моддаси 1-қисмида назарда тутилган жиноят содир этганлиги, унинг биринчи марта жиноят содир этиши, пушаймонда бўлганлиги ҳақидаги аризаси мавжудлигига кўра, қисман бекор бўлган. Биз жиноят ишини кўриб чиқиш давомида битта дори воситаси бўйича эмас, икки-учта дори воситаси бўйича протоколлар қалбакилаштирилганини аниқладик. Бундан ташқари Темиров суд мажлисида дастлабки терговда берган кўрсатмаларини тамоман ўзгартирди. Лекин ҳолат бошқача бўлиб чиқяпти. Буни текшириш лозим. Шу сабаб Темировнинг ҳаракатларига баҳо бериш учун, била туриб ёлғон кўрсатма берганлиги, ҳужжатларни такроран қалбакилаштирилган ҳолатларни текшириш учун материалларни прокурорга юборишни сўрайман, — деди адвокат. 

Адвокат Раҳматов учинчи илтимосномасида судга гувоҳ сифатида чақирилган Фаррух Толипов ишига ҳам эътибор қаратиш лозимлигини айтди. 

Дастлабки терговда С.Р.П. (ҳиндистонлик судланувчи)  тўғридан тўғри кўрсатма бериб, бошқа давлат томонидан берилган гувоҳномани қалбакилаштириш учун 1000 доллар берганман деди. Судда Толиповга С.Р.П.ни танийсанми деб савол берганимизда йўқ деб жавоб берган. Лекин бизнинг адвокатлик суриштирувларимиз давомида ҳиндистонлик С.Р.П. билан 25 маротаба телефонлашгани маълум бўлди, — дейди адвокат Раҳматов. 

Адвокатнинг аинқлаштиришича, Тожикистонда рўйхатдан ўтган дорига берилган гувоҳнома айнан шу гувоҳ томонидан қалбакилаштирилган. 

Толипов ҳали ҳам ишлаяпти. Биз эса ҳали ҳам дори истеъмол қиламиз. Бу нарсанинг олдини олиш керак. Чек қўйиш керак, — дейди адвокат. 

Адвокатнинг илтимосномалари Фармацевтика агентлигининг собиқ раҳбари С.К.нинг бошқа адвокатлари томонидан тўлиқ қўллаб-қувватланган бўлса, ҳиндистонлик судланувчи С.Р.П.нинг адвокати Даврон Аҳмадов томонидан рад этилиши сўралди. Қолган адвокатлар ва судланувчиларнинг айримлари илтимосномани қўллаган бўлса, бошқалари судга ҳавола қилди.

Судлов ҳайъати мазкур илтимоснома бўйича аниқлаштириладиган ҳолатлар борлигини, сўров юборилиб, аниқлаштирилган ҳолатларга кўра, жума, 24 ноябрь куни давом этадиган суд мажлисида ажрим қабул қилиш масаласини муҳокама қиладиган бўлди.