Фарғона вилояти Бағдод тумани ҳокимлигида 14 ноябрь куни педагогика коллежи зиммасига юкланган 2024 йилги газета ва журналлар обуна режасини бажара олмаган муассаса директори туман ҳокимининг ўринбосари томонидан калтаклангани ҳақида хабар берилган эди.
Бағдод тумани ҳокими фармойиши билан 22 ноябрь куни туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Қаҳрамон Муртазоқуловга нисбатан ҳайфсан чораси қўлланилди.
Фармойишга давлат фуқаролик хизматчисининг одоб-ахлоқ қоидалари, туман прокуратурасининг тақдимномаси ва туман ҳокимлигининг одоб-ахлоқ комиссиясининг йиғилиш баёни асос сифатида олинган. Лекин чора кўришга айнан қандай ҳолат асос бўлгани очиқланмаган.
Аввалроқ Олий таълим, фан ва инновациялар вазирлиги ҳолат юзасидан берган баёнотида вазирлик профессионал таълим тизимига масъул сифатида ҳолатни ташвишли деб баҳолайди ва кескин қоралашини билдирган.
Шунингдек, вазирлик газета ва журналларга мажбурий обуна ташкил этилишига мутлақо қарши бўлиб, бундай ҳолатларга қарши кураш, олдини олиш мақсадида олий ва профессионал таълим муассасалари, профессор-ўқитувчилар, ўқувчи-талабалар ҳамда бошқа ходимлар ўртасида доимий тушунтириш ишлари олиб борилишини маълум қилган.
Ҳозирда юқоридаги ҳолат юзасидан туман прокуратураси терговга қадар суриштирув ишларини олиб бормоқда.
Изоҳ (0)