“Док-1 Макс” ишини кўриб чиқаётган суднинг 2023 йил 15 ноябрь куни давом этган навбатдаги мажлисида сиропдан заҳарланиб, вафот этган 3,5 ёшли Маликанинг онаси сўз олиб, боласининг вафоти жудаям аянчли бўлганини айтди. Бу ҳақда судда қатнашган “Дарё” журналисти хабар берди.
Жабрланувчининг ёдга олишича, у “Док-1 Макс” сиропидан дастлаб, 2022 йилнинг баҳор ойида ўғли шамоллаб қолган пайтда биринчи маротаба фойдаланган.
“Док-1 Макс” сиропидан доимий фойдаланиб келганим сабаб 2022 йилнинг кузида шамоллаб қолган қизимга ҳам ичирдим. Дастлаб фарзандим яхши эди. 4—5 сентябрь кунлари фарзандим қайт қила бошлагач, уни Кармана туманидаги туман тиббиёт бирлашмасига олиб борганимизда ошқозонига инфекция тушган деб, ошқозонини ювишди. Ва уйга қайтариб юборишди. Қизим уйда яна қайт қилиб, ҳолсизланиб қолди — кўп ухларди. Шундан сўнг тез ёрдам машинасида Кармана туманидаги болалар шифохонасининг шошилинч тез тиббий ёрдам бўлимига олиб бордик. У ерда боламни жонлантириш бўлимига ётқизишди. Қизим сиймай қўйди, буйраклари ишламай қолди. Шифокорлар боламга нима берганимни сўради. Болангиз заҳарланган деди. Бунинг сабабини билолмай сарсон эдик, — дейди 3,5 ёшида вафот этган Малика Қудратованинг онаси.
Жабрланувнинг маълумот беришича, қизининг буйраги ишламай, сийдик чиқмай қолгач, шифокорлар бемор болага диализ қуйиш кераклигини айтган. Бироқ Навоий вилоятида диализ аппарати йўқлигини айтиб, уларга Самарқанд ёки Бухоро вилоятига боришни маслаҳат берган.
“Диализ бизда йўқ, Самарқанд ва Бухорода бор. Шароитингиз кўтарса, олиб боринг” дейишди. 8 октябрь куни боламни Самарқандга олиб бордик. У ерда диализ катетерини тополмадик. Бир кундан кейин топиб, диализ уладик. Аммо боламнинг аҳволи яна оғирлашаверди. Беҳисоб қонлар қуйилди, дорилар олди. 15 кило чиқадиган қизим ўн беш кунда шишиб, 50 килолик қизга айланди. Ҳатто оғзидан йиринг кела бошлади, — дейди марҳума қизнинг онаси.
Жабрланувчининг билдиришича, қизи Самарқандда шундай оғир аҳволда ётганида уйда бўлган 1,5 ёшли ўғли ҳам “Док-1 Макс” сиропидан икки маротаба ичгани учун унинг ҳам аҳволи оғирлашган.
Ўғлимга ҳам диализ улаш керак дейишди. Ўғлим 1,5 ёшли бола бўлгани учун кичкина катетер керак бўлди. Катетерни Тошкентдан топиб, олиб келдик. Хайриятки, ўша кундан бошлаб ўғлим ўзи сия бошлади. Қизим Малика эса 15 октябрь куни кечаси жудаям аянчли, азобли ҳолатда жон берди. “Онажон мени бу ердан олиб кетинг”, деб йиғларди. Қўллари қонталаш бўлган болам шу шифохонадан чиқиб кетсам яхши бўламан деган ўй-хаёлда бўлган-да. Фарзандим ўз қўлимда жон берди. Мен ўша тушкунликдан ҳамон чиқолмаяпман, — дейди онаизор.
Жабрланувчининг қўшимча қилишича, қизи вафот этгач, шифохонада қолган ўғлининг ёнида қолиши кераклиги сабаб қизини сўнгги манзилга ҳам кузатолмаган.
Қизимнинг таъзиясида ҳам қатнашолмадим. Унинг чеккан азоби кўз олимдан кетмайди. Ўғлимдан пешоб ажралгач, ҳеч бўлмаса ўғлим тирик қолсин деб, шифохонада унинг соғлиғи учун курашдик. Аммо шифокорлар ҳар нарсага тайёр туринг дейишганди. Аллоҳга шукрки, октябрь ойининг охирида ўғлимнинг аҳволи яхшиланди. Уйда даволаниш жараёнларини давом эттирдик. Олти ойдан сўнг ўғлимнинг аҳволи яхши бўлди. Лекин қизимнинг чеккан азоби кўз олдимда ҳали ҳам. Ҳурматли судья, жамиятда инсон қадри юксак бўлса, айбдорларга олий жазо беринг, — деди жабрланувчи она.
Марҳума Малика Қудратованинг онаси ўғли айни кунда унинг кўмагига муҳтож бўлгани сабаб ишдан бўшаганини, турмуш ўртоғи эса болаларини даволатиши ортидан катта қарзга ботганини айтиб, судланувчилардан 1 миллиард сўм миқдорида компенсация талаб қилди.
Изоҳ (0)