Килиан Мбаппе Франция терма жамоаси тарихидаги энг яхши тўпурарлар рўйхатида 3-ўринга кўтарилиб олди

Футбол бўйича Евро—2024 саралаши доирасида Франция Гибралтар устидан 14:0 ҳисобида ғалаба қозонди.

Учрашувда Килиан Мбаппе ҳет-трик қайд этди. Шу тариқа ҳужумчи терма жамоадаги голлари сонини 46 тага етказди ва Антуан Гризманни (44 та гол) ортда қолдириб, 3-ўринга кўтарилиб олди. Фақатгина Терри Анри (51) ва Оливье Жиру (56) ундан олдинда. Қайд этиб ўтиш жоиз, Мбаппе Франция терма жамоасида 74 та ўйин ўтказган.

Шунингдек, Килиан 2023 йилда Франция термаси таркибидаги голлари сонини 10 тадан оширди ва кетма-кет 2 йил давомида 10+ гол урган илк футболчига айланди. 2022 йилда Мбаппе 12 та голга муаллифлик қилди. 

24 ёшли футболчи бутун фаолиятидаги голлари сонини 300 тага етказди. Ҳаттоки, Лионель Месси, Криштиану Роналду ва Неймар ҳам 24 ёшига қадар бу натижани қайд этмаган. 

Футболчининг ўзи бу натижа борасида: “Бу шунчаки жараённинг бир қисми. Фаолияти давомида 800 ёки 850 та гол урган футболчилар бор. Шунинг учун 300 кулгули эшитилади. Клуб ва терма жамоадаги натижаларни яхшилаб, олдинга ҳаракат қилишда давом этиш лозим”, — дейди. 

Сентябрь ойида Роналду фаолияти давомида 850 та гол урган илк футболчи бўлганди. Ҳозирда унинг ҳисобида 1188 ўйинда 858 та гол мавжуд. Месси эса 1044 ўйинда 821 та голга муаллифлик қилган.