Исроил мудофаа армияси ва мамлакат ҳукумати Ғазо секторининг жанубига ҳужум уюштириш бўйича баҳс олиб бормоқда, деб хабар беради Jerusalem Post. Ҳарбийлар ва амалдорларни гаровга олинганлар бўйича вақтинчалик келишув тузилмагунча кутиш керакми деган савол қийнамоқда.
Қайд этилишича, айни вақтда жанговар ҳаракатларни вақтинча тўхтатишга олиб келадиган шундай битим шартлари бўйича музокаралар олиб борилмоқда. Исроил мудофаа армияси сектор шимолининг катта қисмини назорат қилаётган бир вақтда бундай танаффус учун “ҳал қилувчи вазият” юзага келган. Чунки Ғазонинг жанубий қисмидаги жанговар ҳаракатлар кўпроқ ҳаво, денгиз ва қуруқликдаги кучларни, логистикани ўзгартиришни талаб қилади.
Ғазо шаҳрининг ўзи сектор шимолида жойлашган. Унинг жануби (Хан-Юнис, Рафах ва бошқалар) — бу Исроил тинч аҳолини эвакуация қилишга чақирган ҳудуддир. Эвакуация зонасининг чегараси Ғазодан жануброқда ўтган.
Ҳозирда ҲАМАС 240 га яқин исроилликни асирликда ушлаб турибди. Исроил бош вазири Биньямин Нетаньяху ҲАМАСни йўқ қилиш ва жангарилар қўлидаги асирларни озод этиш иккита “муқаддас миссия” эканини маълум қилган.
Аввалроқ Исроил мудофаа вазири Йоав Галлант 16 ноябрь куни Исроил мудофаа кучлари бўлинмалари Ғазо шаҳрининг ғарбий даҳалари эгалланганини маълум қилганди. Вазирнинг таъкидлашича, ҳарбийлар ҳозир қуруқликдаги операциянинг янги босқичини бошламоқда.
Изоҳ (0)