Uzbekistan Airports Тошкент халқаро аэропортида унутиб қолдирган юклар сотилиши тўғрисида тарқалган хабарларга муносабат билдирди.
Ижтимоий тармоқларда 16 ноябрь куни ижтимоий тармоқларда “Тошкент” халқаро аэропортида йўловчилар унутиб қолдирган юклар сотилиши билан боғлиқ хайрия акцияси ўтказилаётгани ҳақида маълумот тарқалди.
Uzbekistan Airports бошқарув компанияси фуқароларни бу каби ёлғон маълумотларга ишонмасликка чақирди.
Қайд этилишича, Ўзбекистоннинг 11 та халқаро аэропортларидан бирортаси, шунингдек, UzCargo ва Uzbekistan Airports Handling шўба корхоналари томонидан йўловчиларнинг унутилган юклари сотилмайди ва учинчи шахсларга топширилмайди. Барча йўқолган юклар аэропорт омборларида 3 ой мобайнида сақланади ва сақлаш муддати тугаши билан утилизация қилинади.
“Uzbekistan Airports сизни ёлғон маълумотларга ишонмасликка ва фирибгарларга пул ўтказмасликка чақиради”, — дейилади муносабатда.
Аввалроқ Тошкент халқаро аэропорти панжараси ортида турган самолётларни суратга олган йигитлар қўлга олингани тўғрисида хабар берилганди. Ўз навбатида Uzbekistan Airports Ўзбекистондаги споттинг ҳаракатини қўллаб-қувватлаши ва ёш авлодни ушбу ҳобби билан шуғулланишига тўсқинлик қилмаслигини билдириб чиқди.
Изоҳ (0)