Тошкент аэропорти йўл ўтказгичи (эстакада)даги камералар жарима сола бошлайди. Бу ҳақда Uzbekistan airports ахборот хизмати хабар берди.
Маълум қилинишича, Тошкент халқаро аэропортидаги эстакадада рухсат этилган тўхташ вақтидан ортиқча турган ҳайдовчилар жаримага тортилади. Йўл ўтказгичга ўрнатилган йўл камералари эндиликда ЙҲХБ тизимлари билан интеграциялашган.
2021 йил июль ойидан бошлаб Тошкент аэропорти йўл ўтказгичига кириш йўловчилар ва кузатувчилар учун очилиб, муайян қоидалар ўрнатилди. Хусусан, турли тоифадаги транспортлар учун – енгил автомобиллар учун – 5 дақиқагача, туристик автобуслар ва микроавтобуслар учун – 10 дақиқагача тўхтаб туриш вақти белгиланди. Йўл ўтказгичнинг ўнг ва чап қисмларини ажратиб турувчи сариқ чизиқда ҳам тўхташ тақиқланади. Юриш қоидаларига риоя қилиш ва йўл ўтказгичда ҳаракатни тартибга солиш аэропорт ходимлари томонидан амалга оширилаётган эди.
2023 йил 1 ноябрдан бошлаб тизим автоматик равишда ишлайди. Хусусан, тўхташ вақтидан ошиб кетганда (тўхтаб туриш тақиқланади) ва сариқ чизиқда тўхтаб туриш учун ҳайдовчиларга жарималар автоматик тарзда белгиланади.
Йўл ўтказгичда бир вақтнинг ўзида 30 тагача автомобиль ёки сайёҳлик автобусларини ҳисобга олган ҳолда 17 тагача автомобиль бўлиши мумкин. Узоқ туришни режалаштираётган ҳайдовчиларга жўнаш терминали олдидаги автомобиль турар жойларидан фойдаланиш тавсия этилади.
Изоҳ (0)