Andijon viloyati, Marhamat tumanidagi maktab o‘qituvchisi o‘z maoshidan a’lochi o‘quvchilarga stipendiya berdi.
Maktabgacha va maktab ta’limi vazirligi matbuot xizmatining xabar qilishicha, 30 yildan buyon rus tili va adabiyoti fanidan dars berib kelayotgan 6-maktab o‘qituvchisi Yorqinoy Mamatisoqova xorijlik pedagoglar tomonidan yo‘lga qo‘yilgan tajribani o‘zi dars beradigan 10-sinf o‘quvchilarida sinab ko‘rishni maqsad qildi.
I chorak yakuni bo‘yicha 4 nafar a’lochi o‘quvchini aniqlab, ularga sinf rahbarligi uchun to‘lanayotgan maoshidan “Ustoz stipendiyasi” berishni yo‘lga qo‘ydi. U yana 12 nafar a’lochi o‘quvchilarini ham taqdirlagan.
Pedagogning so‘zlariga ko‘ra, bu yo‘l bilan u boshqa o‘quvchilarning ham yaxshi o‘qishi uchun motivatsiya bera boshladi. II chorakdan stipendiya olish uchun ko‘p o‘quvchilar harakat qilmoqchi.
“Bu stipendiyani joriy qilganimdan so‘ng o‘quvchilarimning ota-onasi qo‘ng‘iroq qilib, rahmat aytishdi. Farzandi uyga pul solingan konvertni ochmay olib borib, ota-onasiga berganini quvonch bilan gapirishdi. Oila davrasida ochilgan konvertni uy to‘riga qo‘yib qo‘yishibdi. O‘quvchilarim ko‘zidagi quvonch menga olayotgan maoshimdan ko‘ra ko‘proq huzur berdi”, — degan Yorqinoy Mamatisoqova
Xabarda o‘qituvchining maoshi qanchaligi va o‘quvchilarga berilgan stipendiya miqdoriga aniqlik kiritilmagan.
Izoh (0)