“Бошқотирма-2” мультфильмининг трейлери томошалар сони бўйича Pixar рекордини қайд этди (видео)

Pixar студияси “Бошқотирма” мультфильмининг биринчи қисми тақдим этилганидан кейин орадан 9 йил вақт ўтиб, унинг давоми ҳисобланган иккинчи қисм трейлерини эълон қилди. Статистик рақамлар мухлислар мультфильмнинг давомини интиқлик билан кутганларига ишора қилмоқда.

Pixar нинг томошалар сони бўйича бундан аввалги рекорди “Музюрак-2” мультфильми трейлерига тегишли эди. У тақдим этилганидан кейин 1 кун ичида 116 миллион марта томоша қилинган. “Бошқотирма-2” қаҳрамонлари Эльзага тегишли рекордга эга чиқишди. Трейлер бир сутка ичида 157 миллион марта кўрилган. Ушбу кўрсаткичнинг тенг ярми TikTok платформасига тўғри келмоқда.

Мультфильм муаллифлари қўлга киритган натижадан мамнун эканлигини яширмаяпти.

“Трейлер айни вақтда қайд этган натижани кўриб, бундан миннатдор бўлмаслигимиз мумкин эмас. Уни томоша қилган барчага ташаккур – мультфильмни келгуси ёз фаслида кинотеатрларда ҳамма биргаликда томоша қилишини интиқлик билан кутяпмиз”, – деб ёзди лойиҳа муаллифлари.

“Бошқотирма-2” мультфильмининг биринчи трейлерида Райлининг анчайин улғайгани, 13 ёшни қарши олгани кўрсатилган. Ижодкорлар мультфильмда мухлисларни янги саргузаштлар кутаётганига ишора қилган.