Фуқаро Тошкентда 1 йил аввал сотиб олган уйидан собиқ эгасини амаллаб чиқарди. Энди унинг ўғли, келини ва набираси уйдан чиқмаяпти

Икки йил аввал ўз уйини бошқа бировга сотган фуқаро ҳалигача уйни янги эгасига топширмай, турли баҳоналар билан суд қарори ижросини таъминлашга тўсқинлик қилиб келмоқда.

Маълум бўлишича, Тошкент шаҳри Учтепа тумани 9 мавзе 2-уй 73-хонадонда яшовчи фуқаро бундан 2 йил олдин ўзи яшаб келаётган уйини нотариал тарзда сотган. Аммо шу пайтга қадар уйни сотган шахс уйнинг янги эгасига хонадонни топширмасдан, турли баҳоналар билан уйдан чиқмай келаётганди. Уйни сотиб олган фуқаро маблағ зарурати юзасидан хонадонни 3-шахсга сотади. Хонадонни сотган фуқаро унинг кейинги эгасига ҳам уйни топширмай, турли баҳоналар билан вақтни орқага сураверган.

Шундан сўнг мулк эгаси қонунда белгиланган тартибда судга мурожаат қилади. Фуқаролик ишлари бўйича Учтепа туманлараро судининг қарори билан хонадоннинг собиқ эгаси ва унинг вояга етмаган қизи уйдан чиқариб, хонадоннинг қонуний эгасига уй калити топшириш белгиланади. Мажбурий ижро бюроси ходимлари айнан шундай ҳаракатларни амалга ошириб, хонадон калитини уйнинг қонуний эгасига топширди.

Аммо муаммонинг яна бир томони: хонадонда собиқ уй эгасининг ўғли, келини ва уларнинг фарзанди ҳам яшаб келишган экан. Суд қарорида уларни уйдан чиқариш кўрсатилмаганлиги боис МИБ ходимлари бундан ваколатга эга эмасликларини таъкидлашган. Хонадонда ноқонуний яшаб келаётганлар эса ихтиёрий тартибда уйдан чиқмасликларини билдирган. |

“МИБ ходимлари қонун ҳужжатларида икки киши кўрсатилганлигини таъкидлаб, фақат шу икки кишини чиқаришларини айтяпти. Улардан ташқари уйда яна икки киши бор. Лекин уларни уйдан чиқариш МИБнинг ваколатига кирмаслигини айтишмоқда. Менга ҳозир калитни беришди, лекин уйда иккита одам қолмоқда. Қандай қилиб бу уйда яшашим мумкин? Мен ундай жойга кириб яшашни хоҳламайман”, — дейди мурожаатчи.

Ишки ишлар профилактика ходими ҳам хонадоннинг қонуний эгаси мурожаатига рад жавобини билдирди. Яъни бировнинг хонадонига ноқонуний кириб олганларни уйдан чиқариш ёки уларга нисбатдан қонуний чора кўриш ички ишлар ходимининг ваколатига кирмаслигини айтган.

Ҳолат юзасидан “Дарё” мухбири Мажбурий ижро бюроси ахборот хизматидан изоҳ олди.

“Хонадонда қарздордан бошқа шахслар ҳам истиқомат қилиб келган, лекин ижро ҳужжатида мазкур фуқаролар келтирилмаганлиги сабабли уларга нисбатан ижро ҳаракатлари амалга оширилмади.

Ушбу фуқароларни ҳам мажбурий тарзда чиқаришга оид суд қарор бўлса, ижроси албатта таъминланади”, — дейилади бюро ахборотида.