Сентябрь ойида Наманган вилоятининг Чуст туманидаги болалар боғчаларида тарбияланувчи болаларнинг оммавий заҳарланиши кузатилди. Вилоят Мактабгача ва мактаб таълими бошқармаси заҳарланган болалар сони 71 нафар эканини билдирган бўлса, бош прокуратура Чустда фавқулодда ҳолат эълон қилинганини инкор этганди. Соғлиқни сақлаш вазирлиги баёнотига кўра, ҳолат вазир назоратига олинган. Ўз навбатида ССВ мактаб ва боғчаларга тарқатилган йод препарати истеъмолини тўхтатишга кўрсатма берганди.
Олий Мажлис Қонунчилик палатасида 14 ноябрь куни бўлиб ўтган навбатдаги мажлисда соғлиқни сақлаш вазири Амрилло Иноятов ҳисобот берди, “Антиструмин” воқеасига тўхталиб ўтди.
Яқинда бўлиб ўтган “Антиструмин” воқеасини ҳам вазирлик 100 фоиз тан олмоқда. Нормадан ортиқ берилганини билдирмоқда. Бу ҳолат билан боғлиқ бўлган барча масъул ходимлар қонун олдида жавоб еришни бошламоқда ва жавоб беради ҳам.
Бундан буёғига бундай ҳолатлар бўлмаслигига шахсан вазир сифатида бўйнимга олиб, бутун тизимиз билан биргалкида бундай хатоликларга йўл қўймаслик учун курашамиз. Бундай ҳолатга йўқ қўйишга ҳаққимиз йўқ. Тан олиб айтаман бу бизни кеч билганимиз ва хатомиз”, — деди Амрулло Иноятов.
Аввалроқ соғлиқни сақлаш вазирининг ўринбосари Элмира Боситхонова болаларда кузатилган нохуш ҳолат дастлабки текширувларга кўра, дори воситалари ёки овқатдан заҳарланиш эмаслигини алоҳида таъкидлаб, 20 га яқин таҳлил хулосалари олингани ва чуқурлаштирилган таҳлиллардан сўнг вазиятга аниқлик киритишини билдирган эди.
Тендерсиз харид
Ижтимоий тармоқларда Ўзбекистондаги боғча ва мактаб болаларига етказиб берилган “Антиструмин” дори воситасини харид қилиш бўйича жами 21 миллиард 875 миллион сўмлик шартнома тузилгани тўғрисида маълумот тарқалганди. Давлат харидлари порталидаги қўшимча маълумотларда Соғлиқни сақлаш вазирлиги таъсисчилигидаги “Ўзмедимпекс” МЧЖ калий йодид 1 мг (0,001 г) №100 (“Антиструмин”) дори воситасини харид қилиш учун 2022 йил июнь ойида “Само” МЧЖ билан 5 миллиард 610 миллион сўмлик тўғридан тўғри шартнома тузгани, 2023 йил 11 январда эса ушбу шартномага 956 миллион сўмлик қўшимча келишув қилингани очиқланганди.
Соғлиқни сақлаш вазири Амрилло Иноятов ҳамда вазирлик масъули Шароф Ҳамроевнинг “Дарё” журналисти берган саволга аниқлик критишича, вазирлик муассислигидаги МЧЖ “Антиструмин” дорисини сотиб олиш учун интернетда эълон берган.
Калий йодидни тўғридан тўғри олиш ҳуқуқимиз бўлса-да, биз бу борада тендер эълон қилганмиз. Энг арзон нархда сотиб олиш учун сайтда ўзбек ва рус тилларида эълон берилган. Бу эълондан келиб чиқиб, хоҳлаган иштирокчи, хорижлик бўлса ҳам қатнашиши мумкин бўлган. Эълондан сўнг одатда бизга таклифлар келиб тушарди. Лекин бу эълондан сўнг бизга фақат “Само” МЧЖдан таклиф келиб тушган. Фақат бир кишидан, — дейди Шароф Ҳамроев.
Вазир Амрилло Иноятовнинг бунга қўшимча қилишича, эълонда 1 мг (0,001 г) доза сўралгани учун, фақат шу ишлаб чиқарувчи сўралган дозани таклиф қила олган.
Вазирлик вакилининг журналистларга маълумот беришича, “Само” МЧЖ калий йодидни 65 сўмдан таклиф қилгач, вазирлик вакиллари унинг нархини тушириш бўйича таклиф берган. Аммо МЧЖ бунга жавоб қайтармаган. Шундан сўнг, вазирлик муассислигидаги “Ўзмедимпекс” МЧЖ дорини шу нархда сотиб олишга мажбур бўлган. Шунингдек, вазирлик ва МЧЖ сайтларида ғолиб кимлигини эълон қилган.
Журналистлар ва масъулларнинг мазкур масаладаги савол-жавобига қўшилган соғлиқни сақлаш вазири Амрилло Иноятов, “Бу билан шуғулланадиган ташкилотлар бор, улар буни очиқ-ойдин ўрганишяпти. Нархи масаласида ўрганиляпти, аниқланса, ҳаммасини жавобгар қилиш масаласи бор”, — деди.
“Ўзмедимпекс” 2023 йил 4 майда яна “Антиструмин” дори воситасини харид қилиш учун “Само” МЧЖ билан 15 миллиард 275 миллион сўмлик тўғридан тўғри шартнома тузган. Ушбу шартномаларга кўра, жами 21 миллиард 875 миллион сўм маблағ эвазига “Само” МЧЖ 3 миллион 550 мингта миқдорда “Антиструмин” етказиб бериши кўрсатилган. Тармоқ фойдаланувчилари Соғлиқни сақлаш вазирлиги таъсисчилигидаги “Ўзмедимпекс” МЧЖ калий йодидни “Само” МЧЖдан 2022 йилда 5500 сўмдан, 2023 йилда 6500 сўмдан сотиб олганини ёзиб, чакана савдода худди шу ишлаб чиқарувчи, айнан шу дорисини 2800—3000 сўмдан таклиф қилаётганини билдирган.
Изоҳ (0)