“Кўмир таъминот” МЧЖ Тошкент вилоят филиали бошлиғи 50 минг АҚШ доллари миқдорида пора олаётганида ДХХ ходимлари томонидан ушланди.
Маълум бўлишича, муқаддам фирибгарлик билан боғлиқ жиноят содир этганлиги учун судланган шахс мазкур корхонанинг ҳозирги кунда вакант ҳисобланган Сирдарё вилоят филиалига раҳбар сифатида ишга қабул қилинишида кўмаклашиш эвазига фуқародан шунча пул талаб қилган.
ДХХнинг Тошкент вилояти бўйича бошқармаси ходимлари томонидан департаментнинг вилоят бошқармаси билан ҳамкорликда ўтказилган тезкор тадбирда мазкур раҳбар сўралган пулни олган вақтида ушланган.
Шунингдек, Тошкент шаҳрида яшовчи, муқаддам бир неча маротаба судланган, 1964 ва 1982 йилларда туғилган икки нафар шахс фирибгарлик йўли билан қурилиш ишлари билан шуғулланувчи тадбиркордан 20 минг АҚШ долларини олган вақтларида ушланган.
Маълум бўлишича, улар Самарқанд вилоятида жойлашган қишлоқ врачлик пунктлари ва поликлиникаларни жорий таъмирлаш учун ҳукумат қарорлари асосида бюджет маблағлари ажратилишини айтиб, ўзларининг юқори лавозимда ишловчи танишлари орқали 34 миллиард сўмлик пудрат шартномасини тадбиркорга тегишли МЧЖга тўғридан тўғри олиб беришни ваъда қилган. Кейинчалик эса мазкур пудрат шартномаси қийматидан 8 фоизини улуш сифатида беришини талаб қилган.
Ҳозирда иккала ҳолат юзасидан мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)