Ўзбекистонда “яшил” энергетиканинг бугунги ҳолати ва ривожланиш йўналишлари ўрганилди. Бу ҳақда Макроиқтисодий ва ҳудудий тадқиқотлар институти хабар берди.

2022 йилда Ўзбекистонда қуввати 200 МВт га тенг бўлган қуёш электр станциялари ёрдамида 411 млн кВт/с электр энергияси ишлаб чиқарилди. Бу эса 124 млн метр куб табиий газни тежаш, атмосферага 164 минг тонна зарарли газлар чиқарилишининг олдини олиш имконини берди.

2022 йилда қуввати 2 072 МВт га тенг бўлган гидроэлектр станциялари воситасида 6,48 млрд кВт/с электр энергияси ишлаб чиқарилди. Натижада 1,94 млрд метр куб табиий газ тежалди ва атмосферага 2,71 млн тонна зарарли газлар чиқарилишининг олди олинди.

Мамлакатда 2026 йилга бориб, қуёш ва шамол электр станциялари қувватини 8 000 МВт гача, гидроэлектр станциялари қувватини 2 920 МВт гача ошириш режалаштирилган.

Бунинг натижасида қайта тикланадиган энергия улуши 25 фоизга етади, 3 млрд метр куб табиий газ тежалади ва 1 млн хонадон 1 йил давомида газ билан таъминланади. 

2023—2030 йилларда Ўзбекистонда 11 та йирик, 9 та ўртача ва 8 та кичик ва микро гидроэлектр станцияларни қуриш режалаштирилган.

Шунингдек, янги ГЭСларни ишга тушириш туфайли йилига 5,8 миллиард кВт/соат электр энергияси ишлаб чиқарилади ва 1,74 миллиард метр куб табиий газ тежалади.

Аввалроқ ЕИБ Ўзбекистоннинг қуёш электр станцияларини қуриш учун 83,6 млн доллар ажратиши ҳақида хабар берилганди.