“Тошкентда автомобиллар кўпайиб, ҳавонинг ифлосланиши ортиб бораётганига гувоҳ бўлмоқдаман” — Швейцария элчиси Константин Оболенский

Швейцариянинг Ўзбекистондаги фавқулодда ва мухтор элчиси Константин Оболенский Швейцария кунларига бағишланган матбуот анжуманида Тошкент шаҳридаги тирбандликлар ва ҳаво ифлосланиши ҳақида ўз фикрларни айтиб ўтди, дея хабар бермоқда “Дарё” мухбири.

“Икки йилдан буён Тошкентда яшаб, автомобиллар кўпайиб бораётгани ва ҳавонинг ифлосланиши юқори даражага кўтарилганига гувоҳ бўлмоқдаман.

Мен шаҳарсозлик бўйича мутахассис эмасман ва бу бўйича гапиришга билимим етмаслиги мумкин. Лекин фикримча, шаҳарда жамоат транспорти кўп ва етарли бўлиши жуда ҳам зарур. Жамоат транспорти яхши, ишончли ва бир-бирига узвий боғланган бўлиши ва у доимий равишда ривожланиб бориши керак. Бу ҳар қандай давлатда шаҳарни ривожлантиришда муҳим рол ўйнайди”, — деди элчи.

Константин Оболенский Тошкент шаҳрида автобуслар учун алоҳида йўллар ажратилгани маъқул иш бўлганини айтиб, “у йўллардан фақат автобуслар ҳаракатланишини таъминлаш зарур”лигини таъкидлаб ўтди.

Аввалроқ элчи Константин Оболенский Ўзбекистон президенти ҳузуридаги Хорижий инвесторлар кенгашидан жуда миннатдорлигини айтиб ўтганди.