“Toshkentda avtomobillar ko‘payib, havoning ifloslanishi ortib borayotganiga guvoh bo‘lmoqdaman” — Shveysariya elchisi Konstantin Obolenskiy

Shveysariyaning O‘zbekistondagi favqulodda va muxtor elchisi Konstantin Obolenskiy Shveysariya kunlariga bag‘ishlangan matbuot anjumanida Toshkent shahridagi tirbandliklar va havo ifloslanishi haqida o‘z fikrlarni aytib o‘tdi, deya xabar bermoqda “Daryo” muxbiri.

“Ikki yildan buyon Toshkentda yashab, avtomobillar ko‘payib borayotgani va havoning ifloslanishi yuqori darajaga ko‘tarilganiga guvoh bo‘lmoqdaman.

Men shaharsozlik bo‘yicha mutaxassis emasman va bu bo‘yicha gapirishga bilimim yetmasligi mumkin. Lekin fikrimcha, shaharda jamoat transporti ko‘p va yetarli bo‘lishi juda ham zarur. Jamoat transporti yaxshi, ishonchli va bir-biriga uzviy bog‘langan bo‘lishi va u doimiy ravishda rivojlanib borishi kerak. Bu har qanday davlatda shaharni rivojlantirishda muhim rol o‘ynaydi”, — dedi elchi.

Konstantin Obolenskiy Toshkent shahrida avtobuslar uchun alohida yo‘llar ajratilgani maʼqul ish bo‘lganini aytib, “u yo‘llardan faqat avtobuslar harakatlanishini taʼminlash zarur”ligini taʼkidlab o‘tdi.

Avvalroq elchi Konstantin Obolenskiy O‘zbekiston prezidenti huzuridagi Xorijiy investorlar kengashidan juda minnatdorligini aytib o‘tgandi.