Ижтимоий тармоқларда бир эркак бошқа эркакни кутилмаганда зарба бериб бетонга боши билан йиқитгани ҳақида видео тарқалди. Тошкент вилояти ИИББ матбуот котиби ҳолат юзасидан маълумот берди.
Аниқланишича, видеодаги ҳолат 12 ноябрь куни Юқори Чирчиқ тумани Янгибозор ҳудудида жойлашган фастфуд савдо шохобчасида икки фуқаро гап талашиши натижасида содир бўлган.
Жанжалдан сўнг улар ўзаро гаплашиб олиш мақсадида шохобча ташқарисига чиққан вақтда 21 ёшли А.Қ. 26 ёшли Б.Т.нинг юзига мушт туширган ва фуқаро ҳушини йўқотган. Шундан сўнг унга биринчи ёрдам кўрсатилиб, ўзига келтирилган. ИИБга мурожаат ёки хабар берилмаган.
Ҳозирда ҳолат юзасидан ҳудудий ИИБ томонидан терговга қадар текширув ҳаракатлари олиб борилмоқда. Фуқаронинг тан жароҳати юзасидан экспертиза тайинланган.
Дастлабки маълумотга кўра, 26 ёшли Б.Т. шу куни мастлик ҳолатида бўлган ва у шохобча ичида ўзи билан жанжаллашган шахсни ва бошқаларни турли сўзлар билан ҳақоратлаган.
Изоҳ (0)