Ўзбекистон ва Италия ўртасида ҳамкорликни янада ривожлантириш бўйича қатор ҳужжатлар имзоланди

Шавкат Мирзиёев ва Италия президенти Сержо Маттарелла Кўксарой қароргоҳида икки томонлама музокара ўтказганди. Унинг якунида икки давлат ўртасидаги кўп қиррали ҳамкорликни янада ривожлантириш бўйича қатор икки томонлама ҳужжатлар имзоланди.

Президент матбуот хизматининг хабар қилишича, музокаралар якунида икки мамлакат ўртасидаги стратегик шериклик ва кўп қиррали ҳамкорлик муносабатларини янада ривожлантиришга қаратилган қўшма баёнот қабул қилинди.

Давлат раҳбарлари ҳузурида дипломатик паспорт эгаларини виза тартиб-таомилларидан озод этиш тўғрисида ҳукуматлараро битим ҳамда таълим, фан, технология ва инновациялар, спорт соҳасида ҳамкорлик қилиш тўғрисида келишувлар имзоланди.

ЎзАнинг маълум қилшича, Ўзбекистон ва Италия ўртасида қуйидаги шартномалар имзоланди:

• дипломатик паспорт эгаларини виза талабларидан озод қилиш тўғрисида ҳукуматлараро битим;
• дипломатик академиялар ўртасида ҳамкорлик тўғрисидаги англашув меморандуми;
• халқ таълимини ривожлантириш тўғрисидаги идоралараро англашув меморандуми;
• фан, технология ва инновация соҳаларида ҳамкорлик тўғрисидаги идоралараро англашув меморандуми;
•  жисмоний тарбия ва спорт соҳасида ҳамкорлик тўғрисида англашув меморандуми.