Ўзбекистоннинг 14 та олийгоҳи 2023 йилда Осиёдаги топ-1000 таликдан жой олди. Бу ҳақда Олий таълим, фан ва инновациялар вазирлиги ахборот хизмати хабар берди.
Маълум қилинишича, Малайзиянинг Куала-Лумпур шаҳрида ўтказилаётган “QS Higher Education Summit Asia Pacific 2023” саммити доирасида QS рейтинг ташкилоти Осиё университетларининг 2024 йил учун рейтинг (QS Asia University Rankings 2024) натижаларини эълон қилди. Унга кўра, мамлакатнинг 6 та ҳудудидан 14 та олий таълим муассасаси топ-1000 таликдаги Осиёнинг энг яхши университетлари рўйхатига киритилди.
Жорий йилда халқаро тан олинганлик даражаси, илмий-тадқиқотлар ривожи, таълим сифати, халқаро ҳамкорлик, академик мобиллик соҳалари бўйича Осиё олийгоҳлари рейтингида 25 та давлатдан 856 та (148 та илк марта) олийгоҳ иштирок этди. Бунда 3 та Тошкент ирригация ва қишлоқ хўжалигини механизациялаш муҳандислари институти миллий тадқиқот университети, Ўзбекистон миллий университети, Тошкент давлат иқтисодиёт университети “Академик репутация” индикатори бўйича топ-200 олийгоҳлар қаторидан ўрин эгаллади.
Илк бор мазкур рейтингнинг топ-1000 талигидан Тошкент давлат иқтисодиёт университети, Тошкент ахборот технологиялари университети, Жиззах политехника институти, Наманган муҳандислик-технология институти, Тошкент давлат шарқшунослик университети ва Фарғона политехника институти ўрин эгаллади.
Изоҳ (0)