Шавкат Мирзиёев 9 ноябрь куни Иқтисодий ҳамкорлик ташкилотининг Тошкент саммитида нутқ сўзлаб, ташкилотнинг келажакдаги устувор соҳа ва тармоқларини белгилаб берувчи ҳужжатнинг асосий йўналишларини санаб ўтди.
Ўзаро савдони рағбатлантириш
Ўтган йили мамлакатлар ўртасидаги савдо кўрсаткичи 85 миллиард долларни ташкил этди. Бу ташкилотга аъзо давлатлар умумий ташқи савдосининг атиги 8 фоизини ташкил қилади.
“Афсуски, имтиёзли савдо битимини тузиш бўйича кўп йиллик уринишлар кутилган самарани бермаяпти. Тўсиқсиз савдони шакллантириш йўлида ҳали-ҳамон кўплаб чеклов ва муаммолар сақланиб қолмоқда.
Бу ҳолатларни очиқ тан олишимиз ва уларни ижобий томонга ўзгартириш учун вазиятга янгича қараш билан ёндашиш керак. Шу муносабат билан экспертларимиз томонидан ишлаб чиқилган Иқтисодий ҳамкорлик ташкилоти доирасида савдони соддалаштириш тўғрисидаги битимни қабул қилишга чақираман”, — деди президент.
Давлат раҳбарининг қайд этишича, ушбу ҳужжатда товар ва хизматлар савдосини енгиллаштириш, техник ва нотариф тўсиқларни бартараф этиш, божхона, фитосанитария ва ветеринария тартиб-қоидаларини рақамлаштириш, электрон савдони ривожлантиришга алоҳида эътибор қаратилмоқда. Дастлабки ҳисоб-китобларга кўра, бу чора-тадбирлар орқали 2035 йилга бориб ўзаро савдо ҳажмларини камида икки баробар кўпайтириш мумкин.
.jpg)
Ўзаро транспорт-коммуникация боғлиқлигини кучайтириш
Президент аъзо давлатларнинг аксарияти денгизга тўғридан тўғри чиқиш имкониятига эга эмаслигини қайд этди.
“Осиё-Тинч океани, Жанубий Осиё, Яқин Шарқ ва Европа минтақаларининг йирик бозорлари билан боғлайдиган ва бизнинг ҳудудларимиз орқали ўтадиган трансконтинентал транспорт йўлаклари салоҳиятидан тўлиқ фойдаланишимиз зарур.
Келгусида Хитой – Қирғизистон – Ўзбекистон ва Трансафғон мултимодал йўлларининг ишга туширилиши барча аъзо давлатлар манфаатларига мос келади”, — деди Шавкат Мирзиёев.
Давлат раҳбарти Тошкентда 2 ноябрда бўлиб ўтган транспорт вазирларининг йиғилишида “Ўзбекистон—Туркманистон—Эрон—Туркия” транспорт йўлагини ривожлантириш бўйича қабул қилинган ҳужжатга бошқа аъзоларни ҳам қўшилишга, ўзаро тариф ва йиғимларни мақбуллаштиришга чақирди.
Шавкат Мирзиёев Тошкентда ИҲТнинг Рақамли транспорт ва божхона офисини ташкил этиш ташаббусини билдирди.
Саноат кооперацияси ҳамда ишбилармонлик алоқаларини фаоллаштириш, индустриал хабларни шакллантириш
Президент ўзаро инвестисиялар оқимини кўпайтириш, уларни ҳимоя қилиш ва саноат кооперациясини чуқурлаштириш бўйича қўшма ҳаракатлар дастури ишлаб чиқиб, ташкилот котибиятига тақдим этилганини маълум қилди. Мазкур ҳужжатда кимё, энергетика, геология, тўқимачилик, чарм-пойабзал , озиқ-овқат, фармасевтика ва қурилиш соҳаларида янги қўшма лойиҳаларни илгари суриш мақсад қилиб қўйилган.
“Бу эзгу йўлда ташкилотнинг Савдо ва тараққиёт банки билан шериклик алоқаларини кенгайтириш тарафдоримиз”, — деди президент.
Шунингдек, ташкилот доирасида ҳудудлараро саноат кўргазмасини ташкил этиш ва унинг дастлабки тадбирини 2024 йилда Ўзбекистонда ўтказишни таклиф қилди.
.jpg)
Энергетика хавфсизлигини кафолатли таъминлаш
Шавкат Мирзиёев миллий энергетика стратегияларини уйғунлаштириш, минтақалараро энергия ресурсларини узатиш тармоқларини ривожлантириш, “яшил” энергетика технологияларини кенг жорий этишнинг аҳамияти ошаётганини айтди. Ҳамкорлик масалаларини батафсил муҳокама қилиш ва ишларни тизимли асосда олиб бориш учун ташкилот доирасида алоҳида Энергетика вазирлари кенгашини таъсис этишни таклиф этди.
Иқлим ўзгаришларига қарши кураш ва атроф-муҳитни муҳофаза қилиш бўйича алоқаларни жадаллаштириш
Президент ҳозирги вақтда давлатлар бу ўткир муаммоларнинг оғир оқибатларига дуч келаётганини, музликларнинг эриши, сув ресурслари тақчиллиги, чўлланиш, чанг бўронлари, тупроқ емирилиши ва биологик хилма-хилликнинг йўқолиши каби жараёнлар қаттиқ хавотир уйғотаётганини қайд этди.
“Тузилмамиз доирасида Экология масалалари бўйича юқори даражали платформа яратиш бўйича ғоямизни қўллаб-қувватлаганингиз учун ташаккур изҳор этаман. Унинг биринчи анжуманини 2024 йили Самарқанд иқлим форуми доирасида ташкил этишга тайёрмиз”, — деди Шавкат Мирзиёев.
Шунингдек, келгуси ҳафтада Ўзбекистонда БМТнинг Чўлланишга қарши курашиш конвенция си бажарилишини кўриб чиқиш бўйича қўмита йиғилишида ташкилотга аъзо давлат вакилларини фаол иштирок этишга чорлади. Ҳозирда жиддий муаммога айланиб бораётган қум-чанг бўронларига қарши курашиш мақсадида Самарқанд декларациясини қўллаб-қувватлашга чақирди.
Туризм соҳасида ҳамкорликни кучайтириш
Президент трансчегаравий йўналишлар тобора оммалашаётганини ҳисобга олиб, қўшма туристик маршрутларни жорий этиш ҳамда “Ипак йўли” сайёҳлик бренди остида умумий сайёҳлик дастурларини кўпайтиришни таклиф этди. Ташкилот котибияти ҳузурида аъзо мамлакатларнинг туризм маъмуриятлари ва етакчи экспертлардан иборат алоҳида Туризм бўйича маслаҳат қўмитасини ташкил этишни таклиф қилди. Президент унинг илк учрашувини 2024 йилда ташкилотнинг туризм пойтахти деб эълон қилинган Шаҳрисабзда ўтказишга тайёрлигини айтди.
Маданий-гуманитар ҳамкорликни чуқурлаштириш орқали дўст халқларни янада яқинлаштириш
“Ҳар йили мамлакатларимизда навбат билан Маданият, санъат ва кино ҳафталикларини ўтказиб бориш, ёшларнинг ижодий фестиваллари ва инновасион ҳамкорлик платформасини йўлга қўйиш, фундаментал илмий йўналишларда ўзаро ҳамкорликни кучайтириш алоқаларимиз ривожига кучли туртки бағишлайди”, — деди Шавкат Мирзиёев.
Президент ўз нуқти якунида ушбу тарихий саммит ва унинг натижалари ташкилотни самарали ва таъсирчан тузилмага айлантиришга, кўпқиррали шерикликни янги марраларга олиб чиқишига ишонишини алоҳида таъкидлади.
Изоҳ (0)