Транспорт вазири ўринбосари Илҳом Абдугафаров Жанубий Корея аэрокосмик университети президенти Ҳее-Ёунг Ҳурр бошчилигидаги делегация вакиллари билан учрашди. Бу ҳақда Транспорт вазирлиги матбуот хизмати хабар берди.
Учрашувда сўнгги йилларда Ўзбекистонда фуқаро авиацияси соҳасида амалга оширилаётган кенг кўламли ислоҳотлар натижасида соҳада профессионал кадрларга бўлган талабнинг кескин ортиб бораётганини инобатга олган ҳолда университет билан ўзаро ҳамкорликда ўқув курсларини ташкил этиш масаласи муҳокама этилган.
Жумладан, Тошкент давлат транспорт университети билан биргаликда Корея аэрокосмик университети филиалини ташкил этиш, давлат ва хусусий сектор авиация саноати ходимлари учун қисқа муддатли ўқув дастурларини ташкил этиш юзасидан фикр алмашилган.
Ҳее-Ёунг Ҳурр KAU дастурларни ишлаб чиқиши ва тегишли мутахассислар иштирокида махсус маърузалар ўтказишни ташкил қилиш бўйича амалий ёрдам кўрсатишга тайёр эканини маълум қилган.
Аввалроқ Ўзбекистонда Жанубий Корея билан ҳамкорликда миллий онкология маркази барпо этилиши, Тошкент вилоятида Корея билан ҳамкорликда мис фолга ишлаб чиқарилиши мумкинлиги тўғрисида хабар берилганди.
Изоҳ (0)