O‘zbekistonning 14 ta oliygohi 2023-yilda Osiyodagi top-1000 talikdan joy oldi. Bu haqda Oliy taʼlim, fan va innovatsiyalar vazirligi axborot xizmati xabar berdi.
Maʼlum qilinishicha, Malayziyaning Kuala-Lumpur shahrida o‘tkazilayotgan “QS Higher Education Summit Asia Pacific 2023” sammiti doirasida QS reyting tashkiloti Osiyo universitetlarining 2024-yil uchun reyting (QS Asia University Rankings 2024) natijalarini eʼlon qildi. Unga ko‘ra, mamlakatning 6 ta hududidan 14 ta oliy taʼlim muassasasi top-1000 talikdagi Osiyoning eng yaxshi universitetlari ro‘yxatiga kiritildi.
Joriy yilda xalqaro tan olinganlik darajasi, ilmiy-tadqiqotlar rivoji, taʼlim sifati, xalqaro hamkorlik, akademik mobillik sohalari bo‘yicha Osiyo oliygohlari reytingida 25 ta davlatdan 856 ta (148 ta ilk marta) oliygoh ishtirok etdi. Bunda 3 ta Toshkent irrigatsiya va qishloq xo‘jaligini mexanizatsiyalash muhandislari instituti milliy tadqiqot universiteti, O‘zbekiston milliy universiteti, Toshkent davlat iqtisodiyot universiteti “Akademik reputatsiya” indikatori bo‘yicha top-200 oliygohlar qatoridan o‘rin egalladi.
Ilk bor mazkur reytingning top-1000 taligidan Toshkent davlat iqtisodiyot universiteti, Toshkent axborot texnologiyalari universiteti, Jizzax politexnika instituti, Namangan muhandislik-texnologiya instituti, Toshkent davlat sharqshunoslik universiteti va Farg‘ona politexnika instituti o‘rin egalladi.
Izoh (0)