АҚШнинг Россия ядровий ёқилғисига боғлиқлиги мамлакат миллий хавфсизлиги, шунингдек, иқлим бўйича белгиланган мақсадларга эришилишига таҳдид уйғотади. Бу ҳақда ядровий энергетика бўйича вазир ёрдамчиси Кетрин Хафф Financial Times’га маълум қилди. У Конгрессни ички етказиб беришлар занжирини қайта тиклаш ва импортни чеклаш учун маблағ ажратишга чақирди.
Хаффнинг сўзларига кўра, АҚШ ядровий реакторларида фойдаланиладиган ёқилғининг салкам 20 фоизи Россияга боғлиқ шартномалар бўйича етказиб берилишининг ўзи “жиддий ташвиш уйғотадиган” факт эканини билдирган. Амалдорнинг таъкидлашича, Россия дунёнинг ядровий бойитиш салоҳиятини қарийб 50 фоизини назорат қилади ва йиллар давомида жаҳон бозорларига арзон бойитилган уран маҳсулотларини етказиб бериш орқали “АҚШ ядровий таъминот занжирини бузиш учун муваффақиятли ишлаган”.
“Россияга қарамлигимиздан қутулишимиз жуда муҳим. Чора кўрилмаса, Россия ушбу бозорни тутиб туришни давом этади… Бу миллий хавфсизлик, иқлим, энергетик мустақиллигимиз учун муҳим”, — дея қайд этади Кетрин Хафф.
Унинг таъкидлашича, АҚШ администрацияси уранни бойитиш бўйича қувватини оширган маҳаллий компанияларни рағбатлантириш стратегиясини қўллаб-қувватлаш учун қўшимча 2,16 миллиард доллар сўраган.
Хаффнинг қўшимча қилишича, АҚШ 2050 йилга мўлжалланган иқлим мақсадларига эришишни хоҳласа, кейинги икки-уч йилда янги реакторларни қуриш бўйича бештадан ўнтагача шартнома имзолаши лозим.
Изоҳ (0)