Шимолий Корея дунё бўйлаб элчихоналарини ёпмоқда. ОАВ сабабини тушунтирди

Шимолий Корея бутун дунё бўйлаб ўз элчихоналарини оммавий ёпишни бошлади, шу билан бирга Россия билан муносабатларни фаоллаштирди. Bloomberg агентлигига кўра, Шимолий Корея етакчиси Ким Чен Ин дипломатик ваколатхоналар орқали эмас, балки Кремль билан қурол-яроғ бўйича келишувлар орқали кўпроқ пул олишга бел боғлаган бўлиши мумкин.

Шимолий Корея оммавий ахборот воситалари мамлакат октябрь ойида Уганда ва Анголадаги элчихоналарини ёпганини хабар қилди. Пхеньян , шунингдек, Гонконгдаги консулхонаси ва Африкадаги ўндан ортиқ дипломатик ваколатхоналари, шунингдек, Испаниядаги элчихонасини ёпишни режалаштирмоқда.

Жанубий Кореядагиларнинг фикрича, Ким Чен Иннинг “ғазнасини қуритаётган” глобал санкциялар туфайли КХДР бюджетида барча дипломатик идораларни сақлаб қолишга пул етмаяпти. Ҳозирда Пхеньян да 47 та элчихона, учта консулхона ва учта ваколатхона мавжуд.

Аввалроқ АҚШ, Буюк Британия ва бошқа давлатлар Шимолий Корея элчихоналарини ўз фаолиятини молиялаштириш учун ноқонуний молиявий схемалар ишлаб чиқишда, Пхеньян даги етакчилар учун ҳашаматли товарлар харид қилиш ва инсофсиз усуллар билан нақд пуллар олишда айблаган.

Аммо элчихоналарнинг жорий ёпилиши Шимолий Кореянинг Россияга Украинадаги урушда қўлланадиган ўқ-дорилар жўнатиш бўйича ўзининг даромадли бизнесини фаоллаштиргани билан боғлиқ, деб ёзади Bloomberg.

Мутахассисларнинг таъкидлашича, элчихоналар Шимолий Кореяга соф пул оқимлари нуқтаи назаридан иккинчи даражали бўлиб қолган: ҳозир Ким Чен Ин учун Россия билан келишувлар улардан кўра кўпроқ аҳамиятга эга.

Маълум қилинишича, Шимолий Корея август ойидан бери Россияга 1 миллиондан ортиқ артиллерия снарядларини жўнатган ва бу юкларнинг қиймати 3 миллиард долларни ташкил қилиши мумкин. Ушбу сумма Шимолий Корея иқтисодиётининг 10 фоиздан ортиғини ташкил этади.

Бундан ташқари Россия Шимолий Кореяга нақд пул, ўз банк тизимларига кириш, технологиялар узатиш ва қурол яратиш учун ишлатиладиган компонентларни чет элдан сотиб олишга ёрдам кабиларни ўз ичига олувчи пакетни таклиф қилаётган бўлиши мумкин. Бу эса Ким Чен Иннинг элчихоналардан кўрадиган фойдасидан анча яхши, деб хулоса қилди Bloomberg.