Тожикистон президенти Эмомали Раҳмон 17–18 октябрь кунлари Хитой пойтахтида бўлиб ўтаётган “Бир макон, бир йўл” учинчи халқаро форумида иштирок этмайди. Бу ҳақда давлат раҳбари матбуот хизмати Asia-Plus’га хабар берди.
Манба бундай қарор сабабини айтмади, бироқ 19—21 октябрь кунлари Эмомали Раҳмоннинг Хатлон вилоятига иш сафари режалаштирилганини таъкидлади.
Форумда Тожикистондан вакил бўлиш ёки бўлмаслигини билиш учун президент матбуот хизмати мамлакат Ташқи ишлар вазирлигига мурожаат қилишни сўради. Бироқ Asia-Plus Ташқи ишлар вазирлигидан ҳам, Тожикистоннинг Хитойдаги элчихонасидан ҳам жавоб ололмаган.
“Бир макон, бир йўл” лойиҳасининг учинчи форуми мазкур ташаббуснинг 10 йиллигига бағишланади. Дастлаб тадбир 15—17 октябрь кунлари ўтказилиши режалаштирилган бўлса, кейинчалик саналар 17—18 октябрга кўчирилди. Учрашувларнинг асосий мавзуси “Бир макон, бир йўлнинг юқори сифатда биргаликда қурилиши ҳамда умумий тараққиёт ва фаровонликка эришиш учун биргаликдаги саъй-ҳаракатлар” бўлади.
Хитойнинг Global Times нашрига кўра, форумга 130 дан ортиқ давлатдан делегациялар ва 30 та халқаро ташкилот вакиллари таклиф этилган.
Хусусан, Шавкат Мирзиёев Хитой раиси Си Цзиньпиннинг таклифига биноан амалий ташриф билан Пекин шаҳрига етиб боргани хабар қилинганди.
Изоҳ (0)