“Ҳудудгазтаъминот” АЖ ва ҳудудий филиаллар мутахассислари табиий газдан фойдаланиш қоидалари бузилиши ва газ ўғирлаш ҳолатларининг олдини олишга қаратилган тадбирларни ўтказмоқда. Абонентлар кесимидаги барча керакли маълумотлар Табиий газ назорати ва ҳисобининг автоматлаштирилган тизимида (ASKUG) тақдим этилган.
2023 йилнинг октябрь ойида жисмоний шахслар томонидан 1403 та қоидабузарлик қайд этилган. Бу ҳақда “Ҳудудгазтаъминот” АЖ хабар қилди.
ASKUG ёрдамида “Ҳудудгазтаъминот” АЖ ходимлари кўрсаткичларни онлайн тақдим этмаётган 234 та газ ҳисоблагичини аниқлаган, 447 та ҳолат аҳоли томонидан табиий газдан ноқонуний фойдаланишга оид, шунингдек, 722 та техник қоидабузарликлар қайд этилган. Газ таъминоти ходимлари манзиллар бўйича хонадонларга борган ва муаммолар сабабларини аниқлаган.
Ўрганишлар шуни кўрсатдики, айрим истеъмолчилар газ ўлчаш ускуналари ишига ўзбошимчалик билан аралашган, ҳисоблагичларни айланиб ўтган ҳолда газ таъминоти тизимига уланган, огоҳлантиришларсиз хонадондаги газ истеъмол қилувчи ускуналар сонини кўпайтирган, газ таъминоти ташкилотлари билан тегишли ҳужжатга эга бўлмаган. Ҳолатлар юзасидан қонунчиликка асосан ҳужжатлар расмийлаштирилган ва 2,7 миллиард сўм миқдорида жарималар қўлланган.
Шу билан бирга, ASKUG тизими улгуржи истеъмолчилар томонидан табиий газ ўғирланишини аниқлашга ҳам ёрдам беради. Хусусан, 2023 йилнинг тўққиз ойи давомида юридик шахслар томонидан 3399 та техник қоидабузарлик ва 916 та табиий газдан ноқонуний фойдаланиш ҳолатлари аниқланган. Жарималар умумий миқдори 448,2 миллиард сўмни ташкил қилган.
Маъмурий жавобгарлик тўғрисидаги кодекснинг 101-моддасига асосан табиий газдан фойдаланиш қоидаларини бузиш жисмоний шахслар учун базавий ҳисоблаш миқдорининг (БҲМ) 5 баробаридан 10 баробаригача, мансабдор шахслар учун эса 20 баробаридан 25 баробаригача жарима солишга сабаб бўлади. Ўзбошимчалик билан эгалланган ҳудудларда қурилган бино ва иншоотларни газ таъминоти ташкилотлари томонидан газ тармоқларига ўзбошимчалик билан улаш мансабдор шахсларга БҲМнинг 70 баробаридан 80 баробаригача жарима белгиланишига сабаб бўлади.
“Фурсатдан фойдаланиб, ‘Ҳудудгазтаъминотъ’ АЖ истеъмолчилардан қонунчиликка риоя қилишни, зангори ёқилғидан ўғринча фойдаланмасликни, газ таъминоти учун тўловларни ўз вақтида амалга оширишни ва табиий газдан фойдаланиш қоидаларига риоя қилишни сўрайди. Муаммо юзага келган вақтда 1104 рақамига ёки 104 авария диспетчерлик хизматига қўнғироқ қилиш зарур”, — дейилади “Ҳудудгазтаъминот” АЖ хабарида.
Изоҳ (0)