“Hududgaztaʼminot” AJ va hududiy filiallar mutaxassislari tabiiy gazdan foydalanish qoidalari buzilishi va gaz o‘g‘irlash holatlarining oldini olishga qaratilgan tadbirlarni o‘tkazmoqda. Abonentlar kesimidagi barcha kerakli maʼlumotlar Tabiiy gaz nazorati va hisobining avtomatlashtirilgan tizimida (ASKUG) taqdim etilgan.
2023-yilning oktyabr oyida jismoniy shaxslar tomonidan 1403 ta qoidabuzarlik qayd etilgan. Bu haqda “Hududgaztaʼminot” AJ xabar qildi.
ASKUG yordamida “Hududgaztaʼminot” AJ xodimlari ko‘rsatkichlarni onlayn taqdim etmayotgan 234 ta gaz hisoblagichini aniqlagan, 447 ta holat aholi tomonidan tabiiy gazdan noqonuniy foydalanishga oid, shuningdek, 722 ta texnik qoidabuzarliklar qayd etilgan. Gaz taʼminoti xodimlari manzillar bo‘yicha xonadonlarga borgan va muammolar sabablarini aniqlagan.
O‘rganishlar shuni ko‘rsatdiki, ayrim isteʼmolchilar gaz o‘lchash uskunalari ishiga o‘zboshimchalik bilan aralashgan, hisoblagichlarni aylanib o‘tgan holda gaz taʼminoti tizimiga ulangan, ogohlantirishlarsiz xonadondagi gaz isteʼmol qiluvchi uskunalar sonini ko‘paytirgan, gaz taʼminoti tashkilotlari bilan tegishli hujjatga ega bo‘lmagan. Holatlar yuzasidan qonunchilikka asosan hujjatlar rasmiylashtirilgan va 2,7 milliard so‘m miqdorida jarimalar qo‘llangan.
Shu bilan birga, ASKUG tizimi ulgurji isteʼmolchilar tomonidan tabiiy gaz o‘g‘irlanishini aniqlashga ham yordam beradi. Xususan, 2023-yilning to‘qqiz oyi davomida yuridik shaxslar tomonidan 3399 ta texnik qoidabuzarlik va 916 ta tabiiy gazdan noqonuniy foydalanish holatlari aniqlangan. Jarimalar umumiy miqdori 448,2 milliard so‘mni tashkil qilgan.
Maʼmuriy javobgarlik to‘g‘risidagi kodeksning 101-moddasiga asosan tabiiy gazdan foydalanish qoidalarini buzish jismoniy shaxslar uchun bazaviy hisoblash miqdorining (BHM) 5 barobaridan 10 barobarigacha, mansabdor shaxslar uchun esa 20 barobaridan 25 barobarigacha jarima solishga sabab bo‘ladi. O‘zboshimchalik bilan egallangan hududlarda qurilgan bino va inshootlarni gaz taʼminoti tashkilotlari tomonidan gaz tarmoqlariga o‘zboshimchalik bilan ulash mansabdor shaxslarga BHMning 70 barobaridan 80 barobarigacha jarima belgilanishiga sabab bo‘ladi.
“Fursatdan foydalanib, ‘Hududgaztaʼminot’ AJ isteʼmolchilardan qonunchilikka rioya qilishni, zangori yoqilg‘idan o‘g‘rincha foydalanmaslikni, gaz taʼminoti uchun to‘lovlarni o‘z vaqtida amalga oshirishni va tabiiy gazdan foydalanish qoidalariga rioya qilishni so‘raydi. Muammo yuzaga kelgan vaqtda 1104 raqamiga yoki 104 avariya dispetcherlik xizmatiga qo‘ng‘iroq qilish zarur”, — deyiladi “Hududgaztaʼminot” AJ xabarida.
Izoh (0)