Бу мавзу кўпчилик учун бир оз ғалати туюлиши мумкин. Аммо ижодкорлар ҳаётларининг бошланиши билан боғлиқ воқеаларни қувонч билан эслашади.
Болтавой Тошматов: “Киндигим болтада чопилган экан”
— 1960 йилга қадар кўпчилик аёллар уйда фарзандларини дунёга келтиришар, ҳар бир маҳалланинг ўз дояси бўларди. Яширмайман, мен ҳам уйда туғилганман. Дадам раҳматли исмимнинг маъносини айтганида роса кулгандим. Доя аёл қайчи олиб кириш эсидан чиқиб, “Нўмонжон киндик кесишга қайчи бериб юборинг”, деган экан. Дадам ҳам бошқа эркаклар сингари уйда нима қаерда турганини билмасалар керак, шошилганда ҳовлида турган болтани олиб, сувдаги челакка солиб, чопонларига артиб, узатган экан. Хуллас, киндигим болтада кесилганидан кейин доя аёлнинг тавсияси билан Болтавой исмини танлашган экан. Ҳўп ғаройиб замонлар эди, одамлар инфекция нималигини билишмасди.
Исмимни ўзгартиришни кўп таклиф қилишган. Аммо кимлардандир уялиб ота-онам қўйган исмдан воз кечишни истмаганман. Менимча, санъатда томошабинларнинг ёдида қолишимга ҳам шу исмим сабаб. Ноодатий исм барибир одамларнинг эътиборини тортади.
Саида Раметова: “Азизбекни лифтда дунёга келтирганман”
— Ўғлим Азизбек лифтда дунёга келган. Ўшанда Чорсудаги янги уйга кўчган эдик. Жумадулла Раметов ишда, қайнонам раҳматли Туркистонда эдилар. Уй ишларини қилаётганимда аҳволимда ўзгариш сезиб, дарров Жумадулла акага телефон қилдим. Шифохонага олиб борсалар “Ҳали туғуруққача 10-15 кун бор” дейишди, уйга қайтдик. Уйда яна мазам бўлмай, “Жумадулла ака, тез келинг”, дедим. Доямиз корейс аёл “Тез учинчи қаватга олиб чиқинг”, деди. Учинчи қаватга чиқаётганимда лифтда кўзим ёриган. Азизга ҳар доим “Сен лифтда туғилгансан”, дейман, — дейди актриса Саида Раметова.
Теша Мўминов: “Отамнинг олти фарзанди нобуд бўлиб, кейин мен туғилганман”
— Иккинчи жаҳон уруши йилларида бобомнинг уйи мусодара бўлиб, отам раҳматли уйсиз қолган экан. Ижара уйда яшаб, фарзандли бўлган. Аммо кетма-кет туғилган олти фарзанди ҳам яшамай, нобуд бўлаверган. Ўшанда маҳалланинг нуроний отахонлари “Еттинчи туғилган фарзандингнинг киндигини тешада чопиб, шу исм билан номлагин. Боши тошдан бўлиб, яшаб кецин”, дейишган экан. Шундан кейин уйимизга келган доя аёл киндигимни тешада чопган экан, — дейди Теша Мўминов.
Шукурулло Исроилов: “Онам бечора туғилганимдан қувониб кетган”
— Устозим Мирзабек Холмедов туғилишим билан боғлиқ қизиқарли воқеаларни ҳажвия кўринишида айтиб берган. Балки мухлислар бунга эътибор беришмагандир. Аммо ҳақиқатан ҳам дунёга келишим қизиқ кечган. Ўша пайтдаёқ доялар йирик одам бўлишимни тахмин қилишган бўлса керак. Онамни кўп қийнаганман, онам бир неча кун тўлғоқ дардини бошдан кечирган экан. Ҳолдан тойиб, кўзлари қизариб кетган экан. Туғилишим билан “Шукр, шукр қутулдим”, деган экан. Шунда доялардан бири “Болангиз исми билан туғилди, Шукурулло деб қўйинг”, деган экан, — дейди қизиқчи Шукурулло Исроилов.
Йўлчи Ортиқов: “Ўғлим ҳам мен каби йўлда туғилган”
— “Ростдан ҳам йўлда туғилганмисиз?” деган саволни кўп беришади. Тўғри, йўлда туғилганман, аммо бу шунчаки тасодиф сабаб бўлган деёлмайман. Ўғлим ҳам худди шундай йўлда туғилди, аммо унга Йўлчи деб исм қўйгим келмади, — дейди актёр Йўлчи Ортиқов.
Изоҳ (0)