Bu mavzu ko‘pchilik uchun biroz g‘alati tuyulishi mumkin. Ammo ijodkorlar hayotlarining boshlanishi bilan bog‘liq voqealarni quvonch bilan eslashadi.
Boltavoy Toshmatov: “Kindigim boltada chopilgan ekan”
— 1960-yilga qadar ko‘pchilik ayollar uyda farzandlarini dunyoga keltirishar, har bir mahallaning o‘z doyasi bo‘lardi. Yashirmayman, men ham uyda tug‘ilganman. Dadam rahmatli ismimning maʼnosini aytganida rosa kulgandim. Doya ayol qaychi olib kirish esidan chiqib, “No‘monjon kindik kesishga qaychi berib yuboring”, degan ekan. Dadam ham boshqa erkaklar singari uyda nima qayerda turganini bilmasalar kerak, shoshilganda hovlida turgan boltani olib, suvdagi chelakka solib, choponlariga artib, uzatgan ekan. Xullas, kindigim boltada kesilganidan keyin doya ayolning tavsiyasi bilan Boltavoy ismini tanlashgan ekan. Ho‘p g‘aroyib zamonlar edi, odamlar infeksiya nimaligini bilishmasdi.
Ismimni o‘zgartirishni ko‘p taklif qilishgan. Ammo kimlardandir uyalib ota-onam qo‘ygan ismdan voz kechishni istmaganman. Menimcha, sanʼatda tomoshabinlarning yodida qolishimga ham shu ismim sabab. Noodatiy ism baribir odamlarning eʼtiborini tortadi.
Saida Rametova: “Azizbekni liftda dunyoga keltirganman”
— O‘g‘lim Azizbek liftda dunyoga kelgan. O‘shanda Chorsudagi yangi uyga ko‘chgan edik. Jumadulla Rametov ishda, qaynonam rahmatli Turkistonda edilar. Uy ishlarini qilayotganimda ahvolimda o‘zgarish sezib, darrov Jumadulla akaga telefon qildim. Shifoxonaga olib borsalar “Hali tug‘uruqqacha 10-15 kun bor” deyishdi, uyga qaytdik. Uyda yana mazam bo‘lmay, “Jumadulla aka, tez keling”, dedim. Doyamiz koreys ayol “Tez uchinchi qavatga olib chiqing”, dedi. Uchinchi qavatga chiqayotganimda liftda ko‘zim yorigan. Azizga har doim “Sen liftda tug‘ilgansan”, deyman, — deydi aktrisa Saida Rametova.
Tesha Mo‘minov: “Otamning olti farzandi nobud bo‘lib, keyin men tug‘ilganman”
— Ikkinchi jahon urushi yillarida bobomning uyi musodara bo‘lib, otam rahmatli uysiz qolgan ekan. Ijara uyda yashab, farzandli bo‘lgan. Ammo ketma-ket tug‘ilgan olti farzandi ham yashamay, nobud bo‘lavergan. O‘shanda mahallaning nuroniy otaxonlari “Yettinchi tug‘ilgan farzandingning kindigini teshada chopib, shu ism bilan nomlagin. Boshi toshdan bo‘lib, yashab ketsin”, deyishgan ekan. Shundan keyin uyimizga kelgan doya ayol kindigimni teshada chopgan ekan, — deydi Tesha Mo‘minov.
Shukurullo Isroilov: “Onam bechora tug‘ilganimdan quvonib ketgan”
— Ustozim Mirzabek Xolmedov tug‘ilishim bilan bog‘liq qiziqarli voqealarni hajviya ko‘rinishida aytib bergan. Balki muxlislar bunga eʼtibor berishmagandir. Ammo haqiqatan ham dunyoga kelishim qiziq kechgan. O‘sha paytdayoq doyalar yirik odam bo‘lishimni taxmin qilishgan bo‘lsa kerak. Onamni ko‘p qiynaganman, onam bir necha kun to‘lg‘oq dardini boshdan kechirgan ekan. Holdan toyib, ko‘zlari qizarib ketgan ekan. Tug‘ilishim bilan “Shukr, shukr qutuldim”, degan ekan. Shunda doyalardan biri “Bolangiz ismi bilan tug‘ildi, Shukurullo deb qo‘ying”, degan ekan, — deydi qiziqchi Shukurullo Isroilov.
Yo‘lchi Ortiqov: “O‘g‘lim ham men kabi yo‘lda tug‘ilgan”
— “Rostdan ham yo‘lda tug‘ilganmisiz?” degan savolni ko‘p berishadi. To‘g‘ri, yo‘lda tug‘ilganman, ammo bu shunchaki tasodif sabab bo‘lgan deyolmayman. O‘g‘lim ham xuddi shunday yo‘lda tug‘ildi, ammo unga Yo‘lchi deb ism qo‘ygim kelmadi, — deydi aktyor Yo‘lchi Ortiqov.
Izoh (0)