Ҳиндистон ҳукумати маълумотларига кўра, мамлакат шарқидаги Одиша штатида юз берган поезд ҳалокатига электрон сигнализация тизимидаги носозлик сабаб бўлган. Ҳиндистон темирйўл транспорти вазири Ашвини Вайшнав 4 июнь куни тергов жараёнини изоҳлар экан, фожианинг сабабини шундай атади, аммо батафсил маълумот бермади.
“Биз ҳодиса сабабларини ва айбдорларни аниқладик”, — дея унинг сўзларидан иқтибос келтирган АNI агентлиги.
Вазирнинг айтишича, қўшимча тафсилотлар тергов бўйича якуний ҳисобот эълон қилинганидан кейингина маълум бўлади.
2 июнь оқшомида Одиша штатида 3 та поезд тўқнашуви оқибатида 300 дан ортиқ одам ҳалок бўлди, 900 дан ортиғи жароҳатланди. Бу Ҳиндистонда сўнгги 20 йилдаги энг даҳшатли темирйўл ҳалокатига айланди. Мамлакат ҳукуматининг расмий баёнотида айтилишича, Одиша штати ҳудудида йўловчи поезд ҳаракатсиз турган юк поездига урилган ва издан чиқиб кетиб, қарама-қарши йўналишда ҳаракатланаётган бошқа йўловчи поездига урилган.
Ҳиндистон бош вазири Нарендра Моди воқеа жойига ташриф буюрган. У шифохонада жабрланганлар билан ҳам учрашган ва ҳукумат уларнинг даъволаниши учун барча ишни қилишига ваъда берган. Мамлакатда ҳалокат қурбонлари хотирасига мотам эълон қилинган.
Изоҳ (0)