Лионель Месси MLS’да мавсумнинг энг яхшиси бўлиш учун номзодлар қаторидан жой олди

“Интер Майами” ҳужумчиси Лионель Месси MLS’нинг энг яхши янги футболчиси совринига даъвогарлик қилмоқда.

Шимолий Америка лигаси мавсумнинг турли номинацияларининг финалчилари номини эълон қилди. Энг яхши янги футболчи совринига Мессининг номзоди қўйилди. 

Шунингдек, Георгиос Якумакис (“Атланта Юнайтед”) ва Эдуард Левен (“Сент-Луис Сити”) номзодлари ҳам кучли учликдан жой олди. 

Лео мавсумнинг энг қимматбаҳо футболчиси совринига даъвогарларнинг кенгайтирилган рўйхатига киритилганди. Бироқ якуний учликдан жой ололмади. Кучли учлик Лусиано Акоста (“Синсиннати”), Тяго Алмада (“Атланта Юнайтед”) ва Дени Буангадан (“Лос-Анжелес”) ташкил топган.

Месси жорий йилнинг ёзида “Интер Майами” сафига қўшилганди. Аргентиналик футболчи MLS доирасида 6 та ўйинда иштирок этиб, битта гол ва 2 та голли узатмага муаллифлик қилди.