Интернетга 200 мингдан ортиқ ўзбекистонлик фойдаланувчиларнинг маълумотлари тарқаб кетгани ҳақида хабарлар тарқалди.
Айтилишича, 18 октябрь санасида турли ахборот ресурслари, шу жумладан, республика ҳудудида жойлашган тизимларга тегишли бўлган фойдаланувчилар маълумотлари эълон қилингани аниқланган. Уларнинг аксарияти долзарб аҳамиятга эга бўлиб, давлат органлари ва бошқа ташкилотларнинг ахборот тизимлари хавфсизлигига кибертаҳдидларни келтириб чиқараётгани қайд этилган.
Бироқ Рақамли технологиялар вазирлиги мазкур хабарларни инкор этди. Таъкидланишича, Рақамли ҳукумат лойиҳаларини бошқариш маркази ҳамда Киберхавфсизлик маркази билан ҳамкорликда OneID тизими бўйича тарқалган хабар юзасидан дастлабки тезкор ўрганишлар ўтказилган. Натижада OneID тизимига ҳеч қандай киберҳужум бўлмагани ҳамда тизим ишида носозликлар аниқланмагани маълум бўлди. Муаммо катта эҳтимол билан фойдаланувчиларнинг компьютер қурилмалари вирусли зарарлангани оқибати билан боғлиқлиги тахмин қилинди. Айни пайтда бунга қарши тегишли чора-тадбирлар олиб борилмоқда.
Изоҳ (0)